Non – halollik va rizq ramzi. Bugungi fotohikoyamiz qahramoni esa o'z rizqini non orqali topayotgan -- novvoy. Toshkentning eng qadimiy va etnik mahallalaridan biri Eski shahar “Olcha” mahallasida joylashgan ushbu novvoyxona butun guzarni non bilan ta'minlaydi. Odamlari tanish, mehribon, ular nonvoyxonaning doimiy mijozigina emas, musofir novvoyga do'st hamdir.

Qahramonimiz Abdulaziz Isroilov 28 yoshda. U bolaligidan ko'plab hunarlarni o'zlashtirgan, eng ko'p mehr qo'ygani novvoylikdir. 10 yildan beri non yopadi, asli namanganlik bo'lgan Abdulaziz rizq izlab Toshkentga kelib qolgan va Olcha mahallaning sevimli nonvoyiga aylangan.

Biz non yopishga qiziqqancha mavzu xususida biroz suhbatlashdik, jarayonni suratlarga muhrladik.

Abdulaziz novvoy bir kunda ikki mahal o'rtacha umumiy 150-200 ta non yopadi. Xamirni tunda qorib, dimlab qo'yish qulay. So'ng ularga shakl beradi va xalq tili bilan aytganda gajak hosil qiladi. Bu nafaqat non chiroyli chiqishi uchun balki pishish jarayonida to'g'ri ko'tarilishi uchun ham muhim. So'ng nonlar birin-ketin yog'lanib qaynoq tandir devorlariga yopishtiriladi va ular sekin-sekin qizara boshlaydi. Tandir harorati va nonni uzib olish vaqti — novvoylikning eng nozik sirlaridan biridir. Har bir novvoy tandirining tilini faqat o'zi tushunadi. Agar harorat past bo'lsa — non xamir bo'lib qolishi, yuqori bo'lsa — usti kuyib ichi pishmay qolishi mumkin.

Abdulaziz nonvoyning aytishicha, yaxshi non — yengil, ichki qismi g'ovak, tashqarisi esa tiniq qizg'ish bo'lishi kerak. Uning hidi, ko'rinishi va mazasi — novvoy mahorati, tandir harorati va xamir sifatiga uzviy bog'liq.

-Bolaligim amakimning novvoyxonasida o'tgan, uydagilarim o'qishimni judayam istashdi. Oilamizda hamma oliy ma'lumotli, lekin menga novvoylik yoqdi. Ham o'zim yaxshi bilgan, qiziqqan narsam ham, daromadi yomon emas. Shu paytgacha oshpazlikni, tandirda somsa-patirlar yopishni o'rgandim, har xil shakldagi non turlarini yasash ham men uchun qiziq jarayon, o'zimni tandir yonidan boshqa joyda tasavvur qilolmayman. Agar yoshlar ham hunar o'rganmoqchi bo'lsa qo'rqmay tavsiya beraman - deydi qahramonimiz.

Xalqimizda hunarli kishi elda xor bo'lmas, degan naql bor, buvim halol rizq nonday aziz der edilar. Bugun atrofimizda milliy qadriyatlarimizni saqlab kelayotgan, boqimanda bo'lmasdan, hukumatdan nimadir kutmasdan peshona teri bilan tirikchilik qilayotgan insonlarning borligi shunchaki quvonarli.

E'zoza UMRZOQOVA,

Ishonch.uz