Nashr ma'lumotlariga ko'ra, bu boradagi dastlabki o'ntalikni Singapur bosh vaziri Li Syan Lun yillik 1,68 million AQSh dollari (2,2 million Singapur dollari) maosh bilan boshlab bermoqda.

Ikkinchi eng yaxshi maosh oluvchi siyosatchi esa Shveytsariya prezidenti Viola Amerddir. U Shveytsariya federal kengashi rahbari sifatida 569,5 ming AQSh dollari (484 958 Shvetsariya franki) oladi.

Biroq, e'tiborli jihati shundaki, Shveytsariya prezidentligi o'zgaruvchan va Amerd kengashning boshqa a'zosi bilan almashtirilgunga qadar bu lavozimda faqat bir yil ishlaydi. Shunga qaramay, Shveytsariya federal kengashi a'zolari dunyodagi eng ko'p maosh oluvchi qonun chiqaruvchilar hisoblanadi. Shuning uchun Viola Amerd prezidentlik lavozimini boshqa birovga topshirgan taqdirda ham uning maoshi atigi 12 000 AQSh dollariga kamayadi, xolos.

Avstraliya bosh vaziri Entoni Albaneze esa “o'ntalik”ning 3-o'rnida qayd etilgan. U yillik 412,5 ming AQSh dollari (607 520 Avstraliya dollari)ga teng maosh olib, avstraliyalik siyosatchilar orasida eng ko'p maosh oluvchi hisoblanadi.

AQSh prezidenti Jo Bayden esa yiliga 400 ming AQSh dollari maosh oladigan dunyodagi to'rtinchi eng ko'p maosh oluvchi yetakchi hisoblanadi.

Ma'lum bo'lishicha, AQSh prezidentining maoshi Obama 2009-yilda prezident bo'lganidan beri muzlatib qo'yilgan va yaqin orada ko'tarilmaydi. Agar keyingi bir necha yil ichida ularning maoshlari miqdori ko'tarilmasa, Baydendan so'ng keladigan prezidentning “bir yilda topgani” dunyo yetakchilari maoshi reytingida pastlab ketishi mumkin.

Shu tariqa, eng ko'p maosh oluvchi siyosatchilar o'ntaligini quyidagilar davom ettiradi:

• Karl Nexammer (Avstriya kantsleri) 316 700 AQSh dollari / 286 080 yevro
• Kristofer Lyukson (Yangi Zelandiya bosh vaziri) 310 500 AQSh dollari / 498 300 Yangi Zelandiya dollari
• Jastin Tryudo (Kanada bosh vaziri) 301 000 AQSh dollari / 406 200 Kanada dollari
• Olaf Sholts (Germaniya kantsleri) 293 300 AQSh dollari / 264 996 yevro
• Shigeru Ishiba (Yaponiya bosh vaziri) 276 400 AQSh dollari / 40 610 000 iena
• Saymon Xarris (Irlandiya bosh vaziri) 267 300 AQSh dollari / 241 480 evro

O'z navbatida, Rossiya prezidenti Putin yillik 113,6 ming AQSh dollari miqdoridagi maosh bilan Politicalsalaries nashri tuzgan ro'yxatning 28-o'rnida, Frantsiya prezidenti Emmanuel' Makron 156,8 ming AQSh dollari bilan 24-o'rinda, Turkiya yetakchisi Rajab Toyib Erdo'g'on 35,7 ming AQSh dollari bilan 37-o'rinda va XXR Raisi Si Tszinpin 19,2 ming AQSh dollari bilan 39-o'rinda qayd etilgan.