O'zbekiston hukumati joriy yilda sug'oriladigan maydonlarning har gektaridan o'rtacha 2,5 tonnadan, jami 2 mln 537 ming tonna bug'doyni qabul qilishni rejalashtirmoqda.

Bu borada ishlab chiqilgan Hukumat qarori loyihasiga ko'ra, 2024 yil hosilidan fermer xo'jaliklari hamda boshqa g'alla yetishtiruvchilardan 800 ming tonna tovar bug'doyni davlat resursi sifatida va 200 ming tonna bug'doyni urug'lik sifatida Jamg'arma mablag'lari hisobidan xarid qiladi.

Shu bilan birga, bug'doy yetishtiruvchilar ixtiyorida qoladigan bug'doyning 1 mln 537 ming tonnasi vaqtinchalik saqlash uchun don korxonalariga qabul qilinadi.

Davlat resursi sifatida qabul qilinadigan tovar bug'doy hajmlari birja savdolari orqali teng raqobat asosida un ishlab chiqarish quvvatlariga ega bo'lgan tadbirkorlik sub'ektlariga sotilishi ta'minlanadi.
Vaqtincha saqlashga qabul qilinadigan tovar bug'doy hajmlari barcha tadbirkorlik sub'ektlariga birja savdolari orqali cheklovlarsiz sotiladi.

Belgilanishicha, «O'zdonmahsulot» AK tizimidagi korxonalar va bug'doyni saqlash quvvatiga ega bo'lgan tadbirkorlik sub'ektlari Jamg'arma nomidan bug'doy yetishtiruvchilardan tovar bug'doyni sotib olish, qabul qilish va saqlash, shuningdek, xaridorlarga yuklab jo'natish ishlarini amalga oshirish bo'yicha tijorat vakili hisoblanadi.