Axir raqib kim edi? Portugal national football team — jahon futbolidagi eng kuchli terma jamoalardan biri. Ularning safida futbol tarixining tirik afsonalaridan biri — Cristiano Ronaldo bor. Uning yonida ham yuqori saviyali futbolchilar to‘p surmoqda. Bunday raqibga qarshi maydonga chiqishning o‘zi katta jasorat talab qiladi.

Lekin bugun o‘zbek yigitlari ham xarakter ko‘rsatdi. Ular oxirigacha kurashdi, taslim bo‘lmadi, har bir to‘p uchun jang qildi. Bu jamoa ilk bor jahon chempionati sahnasiga chiqqan bo‘lsa-da, o‘zini yo‘qotib qo‘ymadi. Abduqodir Husanov, Abbosbek Fayzullaev va boshqa yigitlar dunyoning eng kuchli futbolchilariga qarshi maydonda munosib kurash olib borishdi. Bu esa kelajak uchun beqiyos tajriba demakdir.

Unutmaylik, katta jamoalar ham bir kunda qurilmagan. Bugungi Portugaliya ham bir vaqtlar orzu qilgan, mag‘lub bo‘lgan, saboq olgan. Bugungi O‘zbekiston terma jamoasi esa endigina jahon futboli elitasi eshigini taqillatmoqda. Har bir o‘yin, har bir daqiqa, har bir xatodan kelajak g‘alabalari uchun poydevor qurilmoqda.

Shuning uchun bugungi o‘yindan keyin boshni egish emas, aksincha ko‘tarish kerak. Chunki O‘zbekiston terma jamoasi nafaqat o‘z raqibiga qarshi, balki millionlab muxlislarning orzu-umidlari uchun ham kurashdi.

Hisob mag‘lubiyatni ko‘rsatishi mumkin. Ammo jasorat, matonat va orzuga sodiqlik — bugun O‘zbekistonniki bo‘ldi. Olg‘a, O‘zbekiston! Bugungi tajriba ertangi g‘alabalarning boshlanishi.

Umid Xudoyqulov