Temirchilikning temir noni: Hunarmandlar oilasi haqida fotohikoya
Ulkan dalaning bir burchida kichik ustaxona bor. Paxsadan qurilgan, yengilgina oqlangan bu bino butun qishloqni temir buryumlar bilan ta'minlaydi. Har bir uyning omborxonasida usta Abdusalom otaning yasagan ketmon-u o'roqlari savlat to'kib, egalariga uzoq yillar xizmat qilib kelmoqda.
Navoiy viloyati Xatirchi tumani Xo'jaqo'rg'on qishlog'ida yashovchi Xushvaqtovlar hunarmandlar oilasi hisoblanadi. Temirchilik qonida bo'lgan 60 yoshli Abdusalom ota 40 yildan buyon shu sohada, rafiqasi Saodat aya esa kashtalari bilan qishloqda mashhur.
– Meros moli to'zadi, merosli hunar o'zadi, deganlariday temirchilikning etagini tutdik. Shungayam 40 yil bo'lib qoldi. Bu o'rtada ustaxonlarimizning qanchasi buzildi, qancha yangi qurdik. Shu hunar bilan bolalarimizni o'qityapmiz, qozonimiz qaynab turibdi, shukr! – Abdusalom usta.
Otaning aytishicha temirchilik sabr va mehr talab qiladigan soha, bunda har kim ijod qila olishi va sifatli ishlashi uchun kasbini sevishi kerak. Usta temirlar bilan uzviy aloqa qilarkan undan biror buyumning shaklini chiroyli tarzda chiqara olish uchun ham eng kamida sabrli bo'la olishi shart. Shu sababdan ota shogirdlarini tanlab oladi, aytishicha yoshlar eng birinchi mashaqqatidanoq zerikib, qiynalib temirchilikni tashlab ketadi. Axir, tikansiz gul, mashaqqatsiz – hunar bo'lmaydi!
Qishloqda kimning temir bilan muammosi bo'lsa davosi Abdusalom ota. Uzoq yillik tajribasi sabab fermalardagi katta mashinalar ham buzilishi bilan ustaxonada qo'nim topadi. Qizig'i, otaga har doim “qancha bo'ldi?” desangiz “ko'nglingizdan chiqarib beravering” degan javobni olasiz. Ustaning ta'kidlashicha, har kim sharoitidan kelib chiqib, rozi bo'lib pul bersagina ishingizda baraka bo'ladi.
Abdusalom ota va Saodat ayaning 3 nafar farzandi bor. Ayni paytda hammasi Oliy o'quv yurtlari talabasi. Muallim bo'lishadi, biroq barcha bolalar temirchilikdan xabardor. O'g'il farzandlar ta'til kunlarida otaga yordamlashsa, qizi Saodat aya bilan kashta tikadi.
– Birvarakayiga 3 ta bola o'qitish qiyin ekan. Enasi bilan ikkalamiz g'ayrat qilyapmiz, marraga oz qoldi, nasib. Prezidentimizga rahmat, ta'lim kreditini chiqarib qo'yibdi, bo'lmasa bizga o'xshagan temirchilar uchtalab kontraktni qanday to'lay olardi?
Murakkab va savobli mehnat ortidan farzandlarini o'qitib, ham odamlarga yaxshilik ulashib yashayotgan usta o'zbek otalarining haqiqiy namunasi, xalqimizga xos bo'lgan sabr-qanoat va mehrning yorqin ifodasidir.
E'zoza Umur
Maqolaga baho bering
0/50
0
0
0
0