O'zbekistonda ishsizlik nafaqasi to'lashning yangi tartibi joriy qilinadi
Joriy yilning 1-noyabridan O'zbekistonda ishsizlik nafaqasi miqdori oshiriladi hamda uni olish shartlari o'zgaradi.
Hujjatga ko'ra, ishsizlik nafaqasi faqat mehnat shartnomasi bekor qilingan hamda so'nggi besh yilda kamida 18 oy ishlagan shaxslarga to'lanadi.
Nafaqa tayinlash uchun mehnat shartnomasi bekor qilinganidan keyin 6 oy ichida murojaat qilish lozim. Bu holda so'nggi 1,5 yildagi o'rtacha oylik ish haqi hisobidan uch oy davomida to'lov amalga oshiriladi.
Birinchi oyda – o'rtacha oylik ish haqining 75 foizi miqdorida, ammo mehnatga haq to'lashning eng kam miqdori (MHTEKM)ning 3 baravari (3,813 mln so'm)dan oshmagan holda to'lanadi. Ilgari to'lov miqdori o'rtacha oylik ish haqining 50 foizini tashkil qilar edi. Keyingi oylarda – o'rtacha oylik ish haqining 50 foizi, lekin MHTEKMning 3 baravaridan ko'p bo'lmagan miqdorda to'lanadi.
Ishsizlik nafaqasini qayta tayinlash uchun avvalgi tayinlangan nafaqa olish muddati tugaganidan keyin rasmiy ravishda kamida 12 oy ishlash zarur.
Agar nafaqa oluvchi bandlik organlari yo'llanmasi bilan suhbatga yoki e'lon qilingan bo'sh ish o'rinlariga bormasa, yoki unga taklif qilingan mos ishdan bosh tortsa, nafaqa to'lovi kelgusi oyning 1 sanasidan to'xtatiladi.
Maqolaga baho bering
0/50
0
0
0
0