Kunlar ancha isib qoldi. Hademay yoz eshik qoqadi. Issiq haroratli kunlarda organizmning suyuqlik balansini ushlab turish uchun tez -tez ichimlik ichishga ehtiyoj sezamiz. Jaziramada eng yaxshi ichimlik toza suvdir. Mutaxassislarning fikricha, suv iste'molida uning miqdori bilan birga harorati ham tana uchun muhim. Masalan, 36-37 darajali toza ichimlik suvi organizmda metobolizm va ichak faoliyatini yaxshilab, qondagi xolesterin miqdorini pasaytiradi, shuningdek, tanadan toksinlarni chiqarib yuboradi.

Mavsumning o'ziga xos boshqa chanqoqbosti ichimliklari ham talaygina. Xususan, yashil yoki o'simlik choylari, moychechak, yalpiz damlamalari, qorag'at, olcha, olxo'ri kabi nordon mevalardan tayyorlangan sharbatlar yoz chillasining eng xushxo'r va foydali ichimliklari sanaladi. Ayniqsa, ayron, qatiq, “okroshka” chanqoqni bosish bilan birga turli mikroelementlar bilan organizmni ta'minlaydi. Sababi, ular orqali tanamizga mineral moddalar va vitaminlar kirib boradi.

Yozda bodring, selderey, qovun, tarvuz, apel'sin singari tabiat ne'matlarini iste'mol qilib turish tanani suvsizlanishdan saqlaydi va organizmga tez singib ketadi.

Xo'sh, issiq ob havoda qanday ichimliklardan voz kechgan ma'qul?

Tongni qahva bilan boshlashni odat qilganlar kuchli jazirama payti bu ichimlikdan voz kechib turishlari salomatliklari uchun foyda. Сhunki qahva chanqoqni bosmaydi, aksincha tarkibidagi kofein qon bosimini oshirib, tanani suvsizlantiradi.
Shuningdek, qadoqlangan sharbatni, shirin gazli ichimliklarni ham taomnomadan chiqarib tashlash mavsumning muhim tavsiyalaridan sanaladi. Sababi ular tarkibidagi ko'p miqdordagi shakar va konservantlar chanqoqni yanada kuchaytiradi.

Muhim eslatma!

Yozda oziq-ovqat mahsulotlari va ichimliklar tarkibi tez buzilishini inobatga olgan holda bozorlarda, katta yo'l chetlarida sotiladigan qo'lbola va yaroqlilik muddati o'tgan ichimliklarni ichish salomatlik uchun xavf tug'dirishini yodda tuting.

Ko'p suv ichish kimlarga tavsiya etilmaydi?

Yurak-qon tomir, buyrak xastaligidan aziyat chekuvchi insonlarga esa ko'p suv ichish tavsiya etilmaydi. Bunday bemorlar shifokor nazorati ostida suyuqlik iste'mol qilishi lozim.