Yangi yil arafasida pomidor va bodring narxi 100 ming so'mgacha ko'tarilgani haqida xabarlar tarqalmoqda. Ishonch.uz muxbiri bu borada Toshkentdagi bir qancha bozorlarda bo'lib vaziyatni o'rgandi.

Birinchi manzil – «Yunusobod dehqon bozori». Bu yerda bodring 40-45, pomidor esa 25-30 ming so'mdan sotilayotganiga guvoh bo'ldik.

Shu kunlarda nega aynan bodring qimmatlashib ketgani, bu sabzavot qaerdan olib kelinayotganiga qiziqdik.

Mavzuga doir: Bodring narxlari nega keskin ko'tarildi? Mutaxassis javob beradi

Savdogarlarning aytishicha, bodring asosan Buxoro, Samarqand viloyatidan olib kelinmoqda. Ayrim sotuvchilar esa mazkur mahsulotni «Qo'yliq dehqon bozori»dan, 1 kilosini 37 ming so'mdan olib kelib, ustiga ozroq narx qo'shib sotmoqda.

Eng qimmat sanalgan «Oloy dehqon bozori»da bodring 70-85 ming so'm bo'lsa, pomidor 35-45 ming so'mdan sotilmoqda.
Sotuvchilarning izoh berishicha, bayram kunlari uning narxi yana ko'tarilishi mumkin.

– Bodring O'zbekistonda kam, o'zimiz ham qimmatga olyapmiz. Ha aytgancha, hozir olib qoling, bayram kuni narxi ikki barobarga ko'tariladi, – deydi sotuvchi.

Ishonch.uz bozorlarni kuzatishda davom etadi. Ko'ramiz, yangi yil arafasida narx bo'yicha odamlarni lol qoldiradigan navbatdagi mahsulot qaysi bo'lar ekan?

Madina PO'LAT qizi