Ўзбекистон касаба уюшмалари Федерацияси ва Халқаро Меҳнат Ташкилоти ҳамкорлигида ўтган халқаро конференцияда Қозоғистон Республикаси касаба уюшмалари Федерацияси раиси, Халқаро касаба уюшмалари конфедерациясининг Бутуневропа минтақавий кенгаши Вице-президенти Сатибалди Даулеталин, бугунги кунда тобора кенг қулоч ёйиб бораётган ва иш ўринларига таъсир этиши башорат қилинаётган сунъий интеллект ҳақида гапирди:

– Ҳозирги кунда меҳнат соҳасида сунъий интеллектдан ҳамма турлича фойдаланаяпти. Эртага ундан фойдаланиш янада оммалашиб кетса, у кўплаб иш ўринларининг қисқаришига олиб келиши мумкин.

Биз Қозоғистонда бир тадқиқот ўтказиб кўрдик. Қайси соҳаларда сунъий инттеллектга ўтиш мумкин, қайси соҳаларда қийин ва қайси соҳаларда ўтиб бўлмайди, деган мазмунда. Натижалар шуни кўрсатдики, 25-29 фоиз ишчиларнинг ўрнини сунъий интеллект билан алмаштириш, яъни автоматлаштириш мумкин экан. Аммо яна бир нарсани ҳам назардан қочирмаслик керак, Марказий Осиё давлатларида аҳоли маошлари унча катта деб айтолмаймиз, шундай экан унга ўтишни секин - асталик билан босқичма – босқич амалга ошириш, олдин эса ундан фойдаланишни тартибга соладиган ҳужжатни қабул қилишимиз лозим. Масалан, Қозоғистонда сунъий интеллект бўйича доктрина қабул қилинган, аммо ҳуқуқий ҳужжат йўқ.

Ҳозирда сунъий интеллектни бошқарадиган мутахассислар йилига 100-140 минг АҚШ доллари ишламоқда. Бу катта маблағ. Биз уларни жалб қилиб, ходимларга сунъий интеллект имкониятларини ўргатишимиз, тушунтиришимиз, уларни замонга мос кадрлар бўлиши учун малака ошириш курсларини ташкил этишимиз керак. Агар ходимларни олдиндан бунга тайёрлаб бормасак, ишчиларимиз меҳнат бозоридаги рақобатга дош беролмайди. Аввало сунъий интеллект билан ишлайдиган ва ишламайдиган касблар рўйхатини шакллантириб олишимиз зарур. Сўнгра ундан тўғри фойдаланишни ўйлашимиз керакки, зеро у келгусида инсониятнинг инқирози учун эмас, ривожланишига хизмат қилсин.

Зебо Намозова,
Мирнодир Миракмалов,
Ishonch.uz