Унинг япроқларида сарғиш суюқлик – ёғ бўлиб, у кўпинча буйрак фаолиятини яхшилайдиган ҳамда асаб тизимини тинчлантирадиган восита сифатида ҳам ичилади.

Сайхунободлик Шавкат Нуралиев ана шу бебаҳо дарахтларни кўпайтириш билан шуғулланади.

– Гулчиликка қизиқардим. Уйда иссиқхона ташкил қилиш орзуим эди. Бугун шу ниятимга етдим. Халк банкидан 30 миллион сўмлик имтиёзли кредит олиб 20 сотих ерда иш бошлаган бўлсам, ҳозир 2 гектар ерда гулчилик билан шуғулланаяпман, – дейди у.

Шавкат гулчилик орқасидан йилига 500 миллион сўм даромад қилаяпти. У турли гул, дарахт кўчатлари билан бирга 30 сотихли иссиқхонасида дунёдаги ўнта ноёб дарахтлардан бири бўлган эвкалипт етиштиради. Унинг баргларига талаб катта. Гулчи иссиқхона ҳажмини янада кенгайтирмоқчи.Унинг оиласидаги қут-баракани кўрган маҳалладошлари соҳага қизиқиш билдиришаяпти.

Гулчи қўни-қўшнилардан 6 кишини иш билан таъминлаган. Мавсумда ишчилар сони 40 кишига етади. Кунига 150-200 мингдан иш ҳақи олаётган ҳамқишлоқлари ўзлари ҳам иссиқхона ташкил этишга ҳаракат қилишаяпти. Эндиликда Шавкат Нуралиев 20 та хонадонга гулчилик сир-асрорларини ўргатмоқда. Кам даромадли икки оилага гул кўчатлари бериб, уларнинг ўзларини тиклаб олишига кўмаклашаётир. “Қўшни қўшнини кўриб эрта туради” деган нақл бор. Гулчи йигит ўзининг сердаромад соҳасини маҳалладошларига ҳам шу тарзда “юқтирмоқда”. “Мустақиллик” маҳалласи гулчиликка ихтисослашиб бораяпти. Ҳалол меҳнат ортидан оилалар тўкинлиги таъминланмоқда.

Баҳор ХОЛБЕКОВА