Ҳолбуки, ҳужжатда исми-фамилияси такрор-такрор тилга олинган амалдор уч ой аввал вазифасидан олиниб, айни лавозимга 2024 йил 14 февраль куни Гулнора Аҳмедова тайинланган.

Кенгаш қарорига кўра, вилоят ҳокимининг ўринбосари – оила ва хотин-қизлар бошқармаси бошлиғи Г.Аҳмедованинг жорий йилнинг 1-чорагида амалга оширилган ишлар юзасидан ҳисоботи маълумот учун қабул қилинган.

Шунингдек, ҳужжатнинг қарор қисмида ҳоким ўринбосари зиммасига тегишли ташкилотлар масъуллари билан биргаликда, ажралиш ёқасига келиб қолган оилаларни яраштириш, ёшларни оилавий ҳаётга тайёрлаш ишларини, хотин-қизлар ўртасида жиноятчилик ва ҳуқуқбузарликларнинг олдини олиш чораларини кучайтириш каби 14 банддан иборат вазифалар юклатилган. Бироқ, юқорида қайд қилинганидек, ҳужжатда ҳокимнинг амалдаги ўринбосари Г.Аҳмедова эмас, балки собиқ ўринбосар Г.Абдуллаеванинг фамилияси нақ олти маротаба зикр этилади.

Бу хатолик бир қарашда арзимас ҳолатдай туюлиши мумкин. Яъни қарор лойиҳаси катта эҳтимол билан шу турдаги аввалги йилларда имзоланган ҳужжатдан кўчирма олиниб, матн ичидаги рақамлар ва айрим жумлаларни ўзгартириш йўли билан тайёрланган. Эътиборсизлик туфайли собиқ амалдор фамилияси ўзгармай қолган.

Бироқ бу ҳол “давлат органлари фаолияти устидан жамоатчилик назорати олиб борувчи тузилма” дея урғу бериладиган маҳаллий кенгашлар ҳамда мазкур котибиятларда фаолият юритувчи қатор мутасаддиларнинг зиммасидаги юмушларни шунчаки қўл учида бажаришлари, вазифасига нисбатан лоқайд ва эътиборсизлигидан бир нишонадир.

Муҳаммад Зиё