USAID Ўзбекистон билан глобал соғлиқни сақлаш, бошқарув ва иқтисодий ўсиш бўйича ҳамкорликни кучайтириш учун қўшимча 14,2 миллион доллар ажратади.
Бу ҳақда ташкилот администратори Саманта Пауер Тошкентга ташрифи чоғида маълум қилган.

Қайд этилишича, USAID беш йиллик ташаббус саналган “Силдан холи Ўзбекистон” дастурини ишга тушириб, у орқали кенг қамровли қўллаб-қувватлаш хизматларини тақдим этиш ва мамлакат бўйлаб силга қарши асосий хизматлардан фойдаланиш имкониятини ошириш мақсадида қўшимча 3,2 миллион доллар сармоя киритади. Ташкилот бу борада 2002 йилдан бери Ўзбекистонга қарийб 60 миллион доллар сармоя киритган.

Шунингдек, 4 миллион долларлик сармоя Ўзбекистоннинг келажакдаги таҳдидлар, эпидемиялар ва пандемияларга чидамлилигини ошириш учун энг яхши тажриба ва Covid-19 чора-тадбирларидан олинган сабоқларга йўналтирилади. Қолаверса, ушбу маблағ Ўзбекистонга лаборатория ва кузатув тизимларини фавқулодда вазиятларга тайёргарлигини, хавф-хатарлар чоғида алоқа боғлаш ва жамоатчилик билан ҳамкорликни кучайтириш имконини беради.

Бизнес ва хусусий секторни мустаҳкамлаш масалалари учун эса 3,5 миллион доллар сармоя киритилади. Ушбу дастур иш ўринлари яратиш, иқтисодий инклюзивликни яхшилаш, кичик ва ўрта корхоналар учун экспорт бозорларини ривожлантириш ва капитални жалб қилиш имконини бериши таъкидланади.

Ўзбекистоннинг 2030 йилгача бўлган стратегиясини қўллаб-қувватлаган ҳолда ҳамда Конгресс билан ҳамкорликда USAID янги маҳаллий бошқарув дастури орқали Ўзбекистонда вилоят ва маҳаллий бошқарувни кучайтириш учун 3,5 миллион АҚШ доллари миқдорида маблағ ажратади. Бу орқали USAID вилоят ва маҳаллий ҳокимиятлар янада эътиборли, халқ билан биргаликда ишловчи ва масъулиятли бўлиши ҳамда ўзбек халқига давлат хизматларини яхшироқ кўрсатиш имкониятига эга бўлишини кўзлайди.