Икки давлат раҳбарлари ОАВ вакилларига берган баёнотида очиқ ва ишчан муҳитда бўлиб ўтган мулоқотнинг самарали натижаларидан мамнун эканликларини, амалий ҳамкорликнинг барча асосий йўналишлари атрофлича кўриб чиқилганини таъкидладилар.

Президент Мирзиёев Мўғулистон президентининг икки томонлама муносабатлар тарихидаги биринчи ташрифи Ўзбекистон-Мўғулистон дўстлигини мустаҳкамлаш ва кўп қиррали ҳамкорликни ривожлантиришга бўлган ўзаро интилишнинг тасдиғи бўлганини қайд этди.

– Мўғулистон биз учун Осиё минтақасидаги анъанавий ва ишончли ҳамкордир. Ўзбекистон-Мўғулистон муносабатлари дўстлик, ўзаро ҳурмат ва қўллаб-қувватлаш тамойилларига асосланган бўлиб, конъюнктурага боғлиқ эмас, – деди Ўзбекистон Президенти.

Қайд этилишича, давлат раҳбарларининг Самарқанд ва Дубайда бўлиб ўтган учрашувларидан сўнг барча даражалардаги алоқалар фаоллашди. Тизимли сиёсий мулоқот ўрнатилди.

Бундан ташқари, изчил ўсиб бораётган товар айирбошлаш ҳажми ҳамда етакчи компания ва корхоналар ўртасидаги ҳамкорлик алоқалари атрофлича таҳлил қилингани, устувор йўналишлар белгилангани ва кенг кўламли ҳамкорликнинг янги кун тартиби келишиб олингани маълум қилинди.

Томонлар минтақавий ва халқаро тузилмалар, жумладан, Бирлашган Миллатлар Ташкилоти, Шанхай ҳамкорлик ташкилоти ва бошқалар доирасида яқин мулоқотларни ва ўзаро қўллаб-қувватлашни давом эттиришга келишиб олдилар.

Жумладан, икки мамлакат пойтахтларида савдо уйларини очиш ва жорий йилда саноат кўргазмаларини ўтказиш, самарали транспорт йўлакларини ривожлантириш ва юк ташувчилар учун қулай шарт-шароитлар яратиш, пойтахтлар ўртасида тўғридан-тўғри авиақатновларни йўлга қўйиш, келгуси йилда Тошкент ва Улан-Баторда ўзаро Маданият кунларини ўтказиш, Ўзбекистоннинг етакчи олий таълим муассасаларида мўғулистонлик талабаларни ўқитишни қайта йўлга қўйиш каби қатор масалалар муҳокама қилинган.