Савол: Февраль — йилнинг энг қисқа ойи. Шу сабаб иш ҳақи ҳам камаядими?

Саволга Ўзбекистон касаба уюшмалари

Федерациясининг Навоий вилояти кенгаши меҳнат-ҳуқуқ инспектори Алишер Раҳматов қуйидагича жавоб берди:

Кўпчиликни қизиқтирадиган савол бу. Иш ҳақининг камайиши ойнинг қисқалигига эмас, балки ходимга нисбатан қўлланилаётган тўлов тизимига боғлиқ.

Агар ходимга белгиланган тариф ставкаси асосида ойлик маош тўланса, февраль ойи 28 ёки 29 кун бўлишидан қатъи назар, иш ҳақи ўзгармайди.

Қонунчиликка мувофиқ, ходим ой давомида иш вақти меъёрини тўлиқ бажарган бўлса, у тўлиқ ойлик маошини олади. Ой кунлари сони кам бўлиши иш ҳақини камайтириш учун асос бўла олмайди.

Яъни:

• ходим тўлиқ ишлаган бўлса —
• меҳнат шартномасида белгиланган ойлик миқдор тўлиқ тўланади.

Агар меҳнатга ҳақ тўлаш ишбай тизимда амалга оширилса, яъни бажарилган иш ҳажмига қараб ҳисобланса, бунда ҳолат бошқача бўлиши мумкин.

Февраль ойида иш кунлари бошқа ойларга нисбатан камроқ бўлгани сабабли, бажарилган иш ҳажми ҳам камайиши эҳтимоли бор.

Натижада, иш ҳақи ҳам мос равишда камроқ ҳисобланиши мумкин.

Бу ерда камайиш ойнинг қисқалиги эмас, балки бажарилган иш ҳажми билан боғлиқ.

Февраль ойи қисқа бўлгани учун автоматик равишда иш ҳақи камаймайди.

Ойлик маош (тариф ставкаси) бўйича ишловчилар — тўлиқ ишласа, тўлиқ маош олади.

Ишбай тизимда ишловчиларнинг иш ҳақи эса бажарилган иш ҳажмига боғлиқ равишда ўзгариши мумкин.

Агар иш ҳақи ҳисоб-китобида қонунбузилиш ҳолатлари кузатилса, ходимлар тегишли тартибда меҳнат органларига мурожаат қилиш ҳуқуқига эга.