Темперамент инсоннинг туғма характери бўлиб, у асаб тизимининг хусусиятлари билан чамбарчас боғлиқдир. Темпераментни тузатиш ёхуд ўзгартириш мушкул вазифа бўлгани сабабли ҳар биримиз индивидуал қобилиятларимизни инобатга олиб, ҳаёт тарзимиз ва меҳнат фаолиятимиз йўналишларини танлаб олганимиз маъқулроқ.

Сизнинг темпераментингиз холерик, сангвиник, меланхолик ёки флегматик типига мансублигини аниқлаш учун бугунги кунда интернетда турли махсус психологик сўровномалар ва тестлар мавжуд. Шунингдек, темперамент турини ҳар бир типга берилган таърифлардан келиб чиқиб аниқлаш ҳам мумкин.

Холерик типдаги инсонлар мулоқотга тез киришувчан фаол ва ҳаракатчан бўлса ҳам, қўпол, қайсар ва дилозор бўлишади. Холерик типдагиларга тадбиркорлик, журналистлик, режиссёрлик ва жарроҳлик йўналишлари тўғри келади. Бу типдаги инсонлар жамоада тезликда ўз ўрнига эга бўла оладиган, стрессга чидамли ва энергияга бой ходимлардир.

Сангвиник типдаги инсонлар қизиқувчан, меҳнатсевар, ҳозиржавоб, шу билан бирга, ўзига ортиқча баҳо берувчилардир. Бундай кишилардан моҳир ташкилотчилар, раҳбарлар, ўқитувчилар чиқади. Уларда туғма раҳбарлик қобилияти мавжуд.

Флегматиклар ўз фикрида собит, хотиржам, ишбилармон бўлишса-да, дангасалик ва тушкун кайфиятдан холи эмас. Бу типдагиларнинг энг кучли хислати хотиржамлик. Шунинг учун ҳам улардан илмий тадқиқот, медицина ва бухгалтерия йўналишлари бўйича кучли мутахассислар чиқади.

Меланхоликлар одатда мулойим, фаросатли, гўзалликка интилувчи бўлиб, тез-тез аразлаб ва ғамгин бўлишади. Улар билан мулоқотга киришиш жуда мушкул, улар учун ижодкорлик ишлари афзалроқ. Бу типдаги инсонлар рассомлик, санъат ва бастакорлик билан шуғулланганлари маъқул.

Ҳақиқий холерик ёки флегматиклар ҳаётда камдан-кам учрайди. Кўпгина ҳолатларда инсонларда барча типлар мужассам бўлиб, улардан бири устунлик қилади, холос.

Темпераментлар яхши ва ёмон турларга бўлинмайди, шунчаки биз бўлажак касбимизни танлаганда темперамент хусусиятларимизни инобатга олишимиз лозим.

Шундагина ўз касбимизнинг моҳир эгасига айланиш эҳтимоли юқорироқ бўлиб, ишлаб турган корхонамизга ва умуман жамиятга тегадиган нафимиз кўпроқ бўлади.

Лола Жўраева,
Ўзбекистон касаба уюшмалари Федерацияси
Бухоро вилояти кенгашининг бўлим мудири