Маълум бўлишича, 1996 йилда туғилган, “Жўмми даритал” лақаби билан танилган Ж.А. Урганч шаҳридаги бозор ҳудудида 1998 йилда туғилган йигитни асоссиз равишда тўхтатиб, турли саволлар билан безовта қилган ва унга жисмоний зўравонлик қўллаб, тан жароҳати етказган. Жабрланувчи ички ишлар органларига мурожаат қилганидан сўнг эса, гумондор уни қўрқитиш ва руҳий босим ўтказишга уринган. Олиб борилган тадбирлар давомида Ж.А. қўлга олинганида, унинг ёнидан марихуана гиёҳванд моддаси топилган.

Яна бир ҳолатда, 1997 йилда туғилган, “Малиш” лақабли А.М. илгари ҳам безорилик жинояти учун судланган бўлишига қарамасдан, спортнинг бокс тури билан шуғулланишини рўкач қилиб, ўзини бошқалардан устун қўйган. У юзма-юз гаплашиш учун чақирган йигит келмагани сабабли, унинг уйига бориб, калтаклаб, тан жароҳати етказган.

Шунингдек, 1991 йилда туғилган “Расул қилич” лақабли Р.Ф. киракашлик билан шуғулланиб юрган вақтида жамоат тартибини қўпол бузган. У йўлда ҳаракатланаётган автомашинани асоссиз тўхтатиб, ҳайдовчини уриб-тепиб жароҳат етказган. Можарога аралашган яна бир фуқаро ҳам зўравонликка учраган.

Мазкур учта ҳолат бўйича ўзини “кўча қоидаси” билан устун қўйган муштумзўрларга нисбатан жиноят ишлари қўзғатилди. Ҳозирда гумондорларга нисбатан эҳтиёт чораси сифатида қамоққа олиш тартиби қўлланилган.