Маълумот учун, кеча, якшанба куни кечқурун бир гуруҳ қуролланган шахслар Дербент шаҳридаги синагога ва черковда отишма содир қилган. Оқибатда биноларда ёнғин келиб чиққан. Деярли бир вақтнинг ўзида Махачқалъадаги синагога, православ черкови ва йўл-патрул хизмати постига ҳужум қилинган.

Ҳужумларда 15 дан ортиқ полициячи, шунингдек, бир неча тинч аҳоли, жумладан, бир руҳоний вафот этди. Ҳуқуқ-тартибот органларининг 10 дан ортиқ ходими жароҳатланган.

“Риа Новости” берган маълумотга кўра, терактга алоқадор деб топилган 6 нафар жангари ўлдирилган. Улардан икки нафари Доғистоннинг Сергокалинский тумани раҳбари Магомед Омаровнинг ўғиллари. Айни пайтда Магомед Омаровнинг ўзи ҳам қўлга олинган.

Доғистонда уч кунлик мотам эълон қилинди.

Тўқнашув жойида хавфсизлик органлари томонидан ўқотар қурол ва ўқ-дорилар олиб қўйилган.

Минтақада тезкор-қидирув тадбирлари давом этмоқда. Террорчиларнинг шериклари қидириляпти. Доғистон республикаси раҳбари Сергей Меликовнинг таъкидлашича, террорчиларнинг барча иштирокчилари топилгунга қадар текширувлар давом этади. Вазият назоратга олинган. Маҳаллий аҳолидан хавфсизлик кучлари ҳаракатларини қўллаб-қувватлаш сўралмоқда.

Меликовнинг фикрича, террорчилар чет элда тайёрланган.

Барча ҳалок бўлганлар ва жабрланганларнинг оилаларига моддий ёрдам кўрсатилади.

Доғистонда терроризмга қарши операция режими жорий этилди.