Ушбу саволга меҳнат муносабатлари бўйича мутахассис Лазиз Қаршиев жавоб берди.

– Меҳнат кодексининг 193-моддасига (https://lex.uz/docs/6257288#6262507)кўра мослашувчан иш вақти режимида иш берувчи айрим ходимлар билан ёки барчаси билан иш вақтини турли соатларга белгилаши мумкин.

Айримлар билан иш вақти бошланишини соат 9 да белгиласа, айримлар билан соат 10 да ёки 11 да белгилаши мумкин ёхуд бир кун 4 соат ишласа, бошқа кунда 12 соат ишлаши мумкин.

Ушбу усул Европа ва Америка давлатларида ривожланган. Ҳозирги кунда Ўзбекистонда кўплаб хусусий корхоналар ҳам самарали фойдаланмоқда, лекин нимагадир давлат ташкилотларида деярли йўқ.

Меҳнат кодекси мослашувчан иш вақтидан фойдаланишга рухсат берган, тақиқлар йўқ! Балки давлат ташкилотлари бундан хабари йўқдир ёки раҳбарларга масъул мутахассислар тўғри тушунтирмагандир. Қисқаси ҳар хил сабаблар бўлиши мумкин.

Ушбу усулни қўллаш учун фақат ушбу содда қоидаларга риоя этишнинг ўзи кифоя:

• иш вақтини ходим билан келишиб белгилаш;
• бир ҳафтада 40 ёки 36 соатлик меъёрга риоя қилиш (жамлаб ҳисоблаш бўлса, ойлик, чораклик ва ҳ.);
• бир кунда иш вақти 12 соатдан ошмаслиги;
• меҳнат шартнома ёки бошқа ички ҳужжатда белгилаш.

Яна бир муҳим жиҳати, ушбу иш режимида тарафлар келишувига кўра кунлик иш вақтини қатъий белгиламасдан ўзгарувчан қилиб белгилаш ҳам мумкин. Масалан, 8:00 дан 22:00 гача вақт оралиғида ходим ўзи хоҳлаган вақтда, 8 соат ишлаб берса бўлди.