Лойиҳанинг асосий мақсади — рақамли маконда фаолият юритаётган яширин “қора бозор”ларни барвақт фош этиш, гиёҳвандлик моддалари тарқалишининг олдини олиш ҳамда жамият хавфсизлигини таъминлашга хизмат қиладиган самарали тизим яратишдан иборат.
Ишлаб чиқилган алгоритм мессенжерлардаги шубҳали ёзишмалар, кодланган иборалар, хавфли алоқалар ва ноқонуний фаоллик белгиларини чуқур таҳлил қилиш орқали гиёҳвандлик савдосига алоқадор занжирларни аниқлаш имконини беради. Бу эса ҳуқуқни муҳофаза қилувчи органлар фаолиятини замонавий рақамли ечимлар билан қўллаб-қувватлаш, жамоат хавфсизлигини мустаҳкамлаш ҳамда айниқса ёшларни зарарли иллатлардан асрашга хизмат қилади.
Маълумот ўрнида айтиш жоизки, жорий йилнинг 20 январь куни Самарқанд шаҳрида Иккинчи Умуммиллий “AI Hackathon”нинг минтақавий босқичига старт берилди. Тадбирда юзлаб иқтидорли ёшлар, дастурчилар ва сунъий интеллект соҳасига қизиқувчи мутахассислар иштирок этмоқда. Умумий ҳисобда 400 нафардан ортиқ иштирокчи рўйхатдан ўтган.
Уч кун давомида иштирокчилар мамлакатнинг етакчи АТ-компаниялари мураббийлари раҳбарлигида жамоаларга бўлинган ҳолда тиббиёт, таълим, киберхавфсизлик, тадбиркорлик ҳамда тақиқланган моддалар айланмасига қарши кураш каби долзарб йўналишларда сунъий интеллект асосида инновацион лойиҳалар ишлаб чиқмоқда.
Шунингдек, хакатон доирасида иштирокчилар учун маҳорат дарслари, амалий семинарлар ва очиқ мулоқотлар ташкил этилди. Бу эса ёш мутахассисларнинг билим ва кўникмаларини янада мустаҳкамлашга хизмат қилмоқда.
Умуммиллий “AI Hackathon”нинг финал босқичи 2026 йил декабрь ойида Тошкент шаҳрида бўлиб ўтади.