Маълумотларга кўра, бу ҳайдовчи пойтахтлик 28 ёшли Фаррух исмли шахс бўлиб, унга тегишли бўлган транспортнинг ҳужжатлари текширилганда рухсатномасиз автомашинани қайта жиҳозлагани аниқланган. Сўнг, унга нисбатан МЖТКнинг тегишли моддалари билан маъмурий баённома расмийлаштирилиб, профилактик суҳбат олиб борилган ва автомашина вақтинча сақлаш учун жарима майдончасига жойлаштирилган.

Шу ўринда бир савол туғилади. Нима учун ўта юқори бўлган тезлик учун мамлакатимизда жазо чоралари жуда енгил? Хўш, автомашинасини 170 км/с тезликда бошқарган шахс белгиланган жариманининг 50 фоизини 15 кун ичида тўлаб, қилган ижтимоий хавфли ишидан осонгина қутулиб қоладими? Одатдаги тартибларимиз шундай-ку? Шунинг учун ҳам кейинги сафар ҳам бу ишни бошқалар такрорлайверади. Таклифимиз шуки, бундайлар учун жарималар жудаям юқори ёки "права" ни олиб қўйиш, автомашина ҳайдаш ҳуқуқини бир неча йилга чеклаш каби жазо турлари билан жазоланиши керак. Зеро шундагина, учар ҳайдовчилар ва бошқалар ҳам бундан яхшигина сабоқ чиқаришади.

Юртимизда ҳар йили минглаб одамлар йўл-транспорт ҳодисалари оқибатида ҳаётдан кўз юммоқда. Натижада кимдир ота ёки онасидан, ака-укасидан, опа-синглиси, ёҳуд фарзандидан жудо бўляпти. Бундай аянчли ҳодисаларни келтириб чиқараётганларга нега қонуний чоралар кўриш кучайтирилмайди? Қонунчиликда ҳатто светофорнинг қизил чироғидан ўтганлик учун ҳам, агар у дастлабки ҳолат бўлса, арзимаган қийматдаги жарима қўлланилади. Ваҳолангки, ўша оннинг ўзидаёқ бахтсиз ҳодиса юз бериши эҳтимолдан холи эмас.

Гап ўзгаларнинг ҳаётини хавф остига қўяётган қоидабузарлар ҳақида кетяпти. Инсон ҳаётига дахлдор бўлган ҳеч бир омил эътиборсиз қолдирилиши мумкин эмас ва бунга қарши чоралар кўрилиши шарт ва зарур.

Холида Эгамбердиева,
Ishonch.uz