Юқорига мурожаат қилишим шартмиди?
Ота-онамизни 2012 йилда кетма-кет йўқотдик... Ўшанда акам уйланган, катта опам ҳам турмушга чиққан эди. Уйда бир опам билан ёлғиз қолдик. Опам менинг бекаму кўст униб-ўсишим учун тиним билмай ишлади, турмуш ҳам қурмади.
Вақти келиб, менинг оилали бўлишимга астойдил бош-қош бўлди. Ҳозир Паркент тумани тиббиёт бирлашмасида фельдшерман. Шу ташкилотда опам ҳам ишлайди. Унинг саломатлигида муаммо бор, шунинг учун маълум муддатларда даволаниб туради.
Ишлаётганига бу йил 8 йил тўлса ҳам, бирор марта ишхонамиз касаба уюшмаси орқали саломатлигини тиклаши учун унга сиҳатгоҳга йўлланма ажратилмаган. Мурожаат қиладиган бўлсак, ҳар сафар унинг ўриндошлик асосида ишлаётганлигини рўкач қилишди. Ахир ўриндошлик асосида ишласа ҳам, меҳнат қиляпти-ку, касаба уюшмаси аъзоси-ку!
Бу сафарги мурожаатим ҳам эътиборсиз қолдирилгач, “Хотин-қизлар муаммолари бўйича ишлайдиган 1211 — Ишонч телефони”га қўнғироқ қилдим. У ердаги ширинсухан опа-сингилларга раҳмат, айтганларимни тезда ёзиб олиб, албатта ижобий ечим топишини билдиришди.
Ўша куниёқ менга Ўзбекистон касаба уюшмалари Федерациясининг Тошкент вилояти кенгашидан қўнғироқ бўлди. Буни қарангки, бир зумда опамга октябр ойида “Ботаника” санаторийсига битта йўлланма ажратиладиган бўлди.
Буни эшитиб, жуда хурсанд бўлдик. Умрида санаторийда бўлмаган опам энди у ерда бўлиб, саломатлигини тиклайдиган бўлди.
Ишонч телефонидагиларга ва масъулларга катта раҳмат!
Бунёд Ғуломов, Паркент тумани.
Долзарб мавзулар
Mақолага баҳо беринг
0/50
0
0
0
0