Гулистон шаҳар тиббиёт бирлашмасида ҳамшира лавозимида ишлаб келган Нагима Тўйчибекова билан тузилган меҳнат шартномаси 2025 йил 23 июнь куни бекор қилинди.

Шундан сўнг у руҳан чўкиб қолди. Раҳбарнинг “Ёшингиз катта, энди ёшлар ишласин!” деган иддаоси қалбини қаттиқ яралади. Ўзини қўлидан бир юмуш келмайдигандек ҳис этди.

Бир танишининг маслаҳати билан Соғлиқни сақлаш ходимлари касаба уюшмаси Сирдарё вилояти кенгашидан амалий ёрдам сўради.

Мурожаат асосида ўтказилган ўрганишда, ходим билан тузилган меҳнат шартномаси қонунчилик талабларига зид равишда бекор қилингани ойдинлашди.
– Қайсидир ташкилот ёки идорада қисқартириш рўй берган тақдирда ким ишда қолиши тегишли қоидаларга, яъни Меҳнат кодексининг 167-моддасига мувофиқ ҳал этилиши керак, – дейди Соғлиқни сақлаш ходимлари касаба уюшмаси Республика кенгашининг Сирдарё вилояти бўйича меҳнат ҳуқуқ инспектори Абдураҳим Албеков.

– Бунда ходимнинг қарамоғида икки ёки ундан ортиқ фарзанди бор-йўқлиги, оиланинг боқувчиси эканлиги, иш тажрибаси инобатга олиниши лозим. Шу жиҳатдан қараганда, мурожаатчи ишда қолишга кўпроқ лойиқлигини аниқладик ва унинг манфаатларини кўзлаб, фуқаролик ишлари бўйича Гулистон туманлараро судига даъво-ариза киритдик.

Ниҳоят, суднинг тегишли қарори билан Н.Тўйчибекова ишга тикланди ҳамда тиббиёт бирлашмасидан унинг фойдасига мажбурий прогул даври учун 7 миллион 785 минг 190, маънавий зарар учун 4 миллион сўм ундирилди.

Зебо НАМОЗОВА
Ishonch.uz