Жамиятдаги, рўзғордаги ижтимоий муаммолар барчаси руҳий зўриқишга сабаб бўлмоқда.

Аслида эса, стресслар муаммоларни енгишга ёрдам бермайди. Бир дардингизни икки қилади. Яхшиси, шифокорларнинг муҳим тавсиясига амал қилиб, жисмоний ва руҳий саломатлигингизни мустаҳкамланг. Бу тавсиялар сиздан ортиқча маблағ талаб қилмайди. Аммо, кутилган натижага эришишингизга ёрдамлашади.

Жисмоний фаоллик: спорт, йога, рақс, пиёда юриш ёки оддий жисмоний машқлар танадаги зўриқишни камайтиради, мияни тозалайди ва кайфиятни яхшилайди. Умуман, жисмоний фаоллик кўплаб касалликларни енгиш воситасидир. Агар жисмонан фаол бўлмасангиз, тонналаб дори қабул қилсангиз ҳам, дарддан халос бўлолмайсиз.

Медитация: медитацион йога, ароматерапия, мусиқатерапия каби бир неча усуллар ёрдамида танингизни ва руҳингизни дам олдиринг.

Тўғри нафас олиш, нафас машқларини бажаришнинг ҳам аҳамияти катта. Тинчланиш, диққатни жамлаш учун чуқур нафас олишга ҳаракат қилинг.

Соғлом овқатланиш: ўзингизни енгил ва яхши ҳис қилишингизга ёрдам беради, жисмоний ва руҳий ҳолатингизга таъсир қилади.

Ўзингиз учун вақт ажратинг: китоб ўқинг, расм чизинг, қўшиқ айтинг, кашта тикинг ёки шу каби ўзингизга ёқадиган нарсалар билан шуғулланинг.

Меҳр улашинг: дўстларингиз ва оилангиз билан мулоқот қилиш агрессив ҳис-туйғуларингизни енгишга ёрдам беради, одам тафтини одам олади дейишлари бежиз эмас.

Вақтни тўғри тақсимланг: кунлик вазифаларингизни белгилаб олинг, энг муҳимларини танланг, уларни вақтида бажаришга одатланинг.
Гаджетлардан танаффус қилинг: вақти-вақти билан ижтимоий тармоқлар ва технологиялардан узоғроқ бўлиш миянинг дам олишига ёрдам беради.

Массаж қабул қилинг: стрессни, тарангликни бартараф қилишда тузли ванналар, иссиқ ҳаммом ва уқалаш машқлари яхши ёрдам беради.

Озодаликка риоя қилинг: хонадонингиз, иш жойингиз қанчалик озода, тартибли бўлса, кайфиятингиз шунча яхши, ишингиз унумли бўлади.

Ижобий фикрланг: шукрона келтиринг, ҳаётни севинг, шунда омад сизга кулиб боқади.