Жинвар номи курд тилида "аёллар майдони" деган маънони англатади. Қишлоқ 2018 йилда қурилган бўлиб, 30 та уйдан иборат. Қишлоқда 20 та оила бор, лекин у ерда фақат аёллар ва болалар яшайди. Жинварда эркаклар яшаши мумкин эмас, лекин улар аёл қариндошларини зиёрат қилишлари мумкин. Ўғил болалар уйлангунга қадар оналари билан қолишлари мумкин. Қишлоқда мактаб, новвойхона, кичик бозор ва экин далалари бор.

Бу ердаги аёлларнинг кунлик юмушлари нон ёпиш, қўй боқиш, сабзавотларни парвариш қилиш ва овқат ҳозирлашдан иборат.


— Қишлоқ бутунлай изоляция қилинган, хавфсиз. Асосан эри урушда ҳалок бўлган ёки боқувчини йўқотганлар яшайди. Бу ерда аёллар зулмдан узоқ, бироқ ҳаёт жудаям зерикарли. Сабаби қишлоқ болалар ва аёлларни жамиятдан узоқлаштиради–дейди Ҳанна Алкалаф.

40 ёшли Ҳанна ўзининг уч фарзанди билан шу қишлоқда яшайди. Сурия шимоли-шарқидаги Амуда шаҳридан келиб чиққан Ҳаннанинг эри урушда ҳалок бўлган. Ўзи шундоқ ҳам қийинчиликда яшаётган оила оч қолади. Қашшоқлик сабаб шу қишлоққа келиб яшашга қарор қилади.

Бахтли ҳаёт, лекин...
Ҳанна бу қишлоқда хотиржам ҳаёт кечирмоқда, бироқ шунга қарамай ота-онаси, қўшнилари билан яшаган даврларини кўп соғинади. Қишлоқ аёлларга тирикчилик қилиш ва болаларини мактабда ўқитиш имкониятини беради. Бироқ, бу уларнинг ҳаётидаги барча муаммоларга тўлиқ ечим эмас. Улар изоляцияда яшашдан кўра, одатдаги турмуш тарзини кўпроқ қўмсайди.

Севинч РАВШАНОВА тайёрлади.
ЎзДЖТУ Халқаро журналистика факультетининг
1-босқич талабаси