Тошкент шаҳрида ногиронлиги бўлган шахслар учун “Ижтимоий такси” пилот лойиҳаси ишга тушди.

Ижтимоий ҳимоя миллий агентлиги берган маълумотга кўра, ушбу лойиҳа аҳолининг ижтимоий ҳимояга муҳтож қатламларини қўллаб-қувватлаш, жумладан, ногиронлиги бўлган шахслар ва таянч харакатида муаммолари бўлган болалар учун ижтимоий соҳа объектлари, таълим муассасаларига бориб келишларига қулайликлар яратиш мақсадида йўлга қўйилган.

Хизматдан фойдаланиш Yandex Go иловаси орқали амалга оширилади. Мазкур иловада ногиронлиги бўлган шахсларнинг эҳтиёжларига мослаштирилган махсус функция Yandex Go иловасининг алоҳида экранида мавжуд бўлиб, уларни ҳар қандай тарифда манзилга етиб олиш учун танлаш мумкин. Эътиборлиси, барча тарифларда хизмат нархлари ўзгармайди.

Шунингдек, буюртмани қабул қилган ҳайдовчига мижозни манзилга олиб бориш давомида қуйидаги махсус вазифаларни амалга ошириш кераклиги ҳақида хабар берилади.

Жумладан:

• машина топишга ёрдам беринг манзил карточкасида фойдаланувчига машинани топиш, унинг ёнига келиш ва салонга ўтиришга ёрдам берувчи изоҳ кўринади;
• эшитишида муаммолари бўлган шахсларга ҳайдовчи чат орқали мулоқот қилишни сўраши керак бўлади;
• “ногиронлик аравачасидаман” бу функция танланган бўлса, ҳайдовчида “ногиронлар аравачасида бўламан, машинага ўтиришда ёрдам, бўш юкхона керак” изоҳи кўринади.