Туркиядан қайтган ватандош: “Кўз тегмасин, одамларда беш йил олдинги тушкунлик йўқолгандек”
Узоқ йиллардан буён Туркияда яшаётган самарқандлик журналист Ситора Алихонзода яқинда Ўзбекистонга келди ва ўз кечинмалари билан бўлишди. Маддоҳликка эҳтиёжи йўқ, холисликка ҳамиша ёндошган қаламкашнинг сўзларида ҳар биримиз ўйлаб кўрсак арзийдиган жиҳатлар бор.
“Ҳой Ватандош! Ўзбекистонда қандай неъматлару файз-баракот ичида яшаётганингиздан хабарингиз борми? Билмасангиз, мана мен айтаяпман: Ўзбекистондақа макон, бундайин юрт бошқа жойда йўқ!
Эҳтимол, ташрифимиз ёз фаслига тўғри келгани учундир, билмадим, ўзимизда ҳаёт анча тўкин-сочиндек туюляпти. Дастурхонларимиз файзли, пулимиз баракали.
Қиш фаслида газ, свет муаммоси бўлмаса, соғлиқ ва таълим тизимида сифат яхшиланса ҳамда коррупция (порахўрлик, таниш-билишчилик) тугатилса, Ўзбекистон ҳақиқатан жаннатмакон деган сифатга муносиб давлат бўлади.
Яна кузатиб шу хулосага келдимки, бизнинг инсонлар анча меҳнаткаш, топармон-тутармон! Самарқанд шаҳри ва туманларини айланиб, охирги икки йилда жуда катта ўзгаришлар бўлганига, бўлаётганига гувоҳ бўлдим. Энг муҳими, аҳолининг турмуш даражаси ўсган.
Буни ўзимча икки ҳолат билан изоҳлаяпман:
- Одамларимиз четга кўп чиқиши (иш, саёҳат, зиёрат ва ҳоказо) ўзининг ижобий таъсирини кўрсатган;
- Ёшлар, яъни ҳозирги авлоднинг замон билан ҳамнафаслиги, олдингиларга нисбатан кўпроқ яхши, чиройли ва енгил ҳаётга интилиши, янгиликка ўчлиги сабаб ...
Бизда ўсиш ва илгарилаш кучли. Туркияда биз яшайдиган бир туман ёки шаҳар билан қиёслайдиган бўлсам, беш йил ичида бу ерда (ўзимиздаги) ўзгариш, ривожланиш анча баланд, сезиларли даражада эканини яққол фарқлаш мумкин.
Агар шу суратда кетадиган бўлса, келажакда янаям зўр, максимал даражадаги янгиланишлар бўлса ажабмас. Одамларнинг кайфияти ҳам яхши томонга ўзгарган.
(Билмадим, буни нима билан боғласа бўлади). Беш йил олдин одамларда тушкунлик, агрессивлик элементлари устунлик қиларди. Ҳозир эса аксинча(дек).
Мени энг ҳайрон қолдираётган озиқ-овқат, ҳатто кийим-кечакларда нарх-навонинг стабил туриши бўлди. Беш йил олдинги нархлар билан деярли фарқ сезилмайди.
Ўша пайтлар ҳам битта оддий рўмолни 35-40 минг сўмга олардим, кеча бозордан учта рўмол(шарф)ни келиштириб 120 мингга олдим (9 $). Туркияда эса биттасини 5- 8$ атрофида оласиз.
Ўғлим мевали йогурт ичади. Кунида 3-4 бутилкадан. Туркияда энг арзонини 25 ТЛ (76 цент)дан олардик. Бу ерда эса 6 мингдан бошланар экан (48 цент).
Килограмга ўлчаб кийим сотадиган либос дўконлари бор экан. 250 мингга, бир кило - бир дунё хитой, ўзбек кийимларидан олдим. Сифати ҳам ёмонга ўхшамайди. Дизайни бўлса турк либосларига қараганда анча чиройли, бежирим.
Хуллас, ниманики солиштирмай ўзимизда нархлар анча маъқул бўлиб чиқяпти.
Турмуш ўртоғим 800-1000 доллар атрофида маош олади. Лекин ўша маош билан рўзғор ва бошқа харажатларни ойига учма-уч етқазамиз. Бу пул билан эса Ўзбекистонда бир ойда шоҳона яшаш мумкин. Шунга хўжайинга ёзиб юбордим: Энди
Туркияга бормайман. Сиз келинг деб). Қайтиб борсам ҳам энди кўзим орқада қолса керак. Эҳҳҳ…
Ўзи Туркияга, туркларга, туркча маданият ва одатларга, айниқса, овқатларига зўрға кўниккан эдим-а! Энди яна бошидан бошлашга тўғри келади” – дея ўз постини якунлаган ватандошимиз.
Mақолага баҳо беринг
0/50
0
0
0
0