Юқори малакали тренерлардан сабоқ олган ёшлар "Сув борми?" челенжини фаол амалга оширди. Мазкур савол юзлаб одамларни қамраб олиш билан бирга, лойиҳанинг энг катта саволига, мақсад-мазмунига айланди.

Дарҳақиқат, суви доим жўмракларда оқиб турадиган одам учун бу савол ўта жўн туюлиши мумкин, лекин сувни узоқлардан олиб келадиган, жўмрак тугул қувурлар етиб бормаган, ичимлик сувини сотиб олаётган жойларда яшаётган аҳоли учун бу - оғир савол. Ёшлар лойиҳа давомида айнан шу масаланинг моҳиятини кўпроқ англади.

Лойиҳанинг яна бир вазифаси иштирокчилар Ўзбекистоннинг сув ресурслари интерактив картасини яратишга ўз ҳиссасини қўшиши керак эди. Улар ўз атрофидаги сув объектини чуқур ўрганиши, у ҳақдаги маълумотларни махсус ботга юклаши ва объектни расмга тушириши лозим эди.

300 дан ортиқ ёшлар шу мақсадда харитага маълумот жўнатишди ва бу жараён ҳали давом этмоқда. Харитада ёшлар ўзлари юборган сув нуқтаси, сув ҳақидаги энг қисқа маълумотлар, нуқта ҳақида маълумот юборган одам ҳақидаги маълумотлар жойлаштирган. Бу орқали йиллар мобайнида сув изини кузатиш мумкин бўлади. Тез орада Ўзбекистонда ёшларнинг саъй-ҳаракати ёрдамида яратилган сув ресурслари ҳақидаги очиқ маълумотлар базаси, интерактив харита ишга тушади.

Ҳулкар Абдуллаева,
«Сув борми» лойиҳаси координатори, журналист