AQSh Davlat kotibining Janubiy va Markaziy Osiyo bo'yicha yordamchisi Donald Lu 4-11 noyabr kunlari Qozog'iston, O'zbekiston va Hindistonga boradi.

Lu sentyabr oyida BMT Bosh Assambleyasi doirasida bo'lib o'tgan C5+1 sammiti va oktyabr oyida bo'lib o'tgan C5+1 mintaqaviy aloqalar vazirlari yig'ilishida erishilgan kelishuvlarni mustahkamlash maqsadida Markaziy Osiyodagi AQSh delegatsiyasiga rahbarlik qiladi.

So'ngra Donal'd Lu AQSh-Hindiston “2+2” formatidagi vazirlar muloqotiga tayyorgarlik ko'rish va uni qo'llab-quvvatlash uchun Hindistonga boradi.

AQSh Davlat kotibi yordamchisi AQSh-O'zbekiston strategik sheriklik muloqoti doirasida O'zbekiston hukumatining yuqori martabali amaldorlari bilan uchrashib, ikki davlatning xavfsizlik sohasidagi sherikligini kengaytirish va mintaqaviy muammolarni hal qilish yo'llarini muhokama qiladi.

Shuningdek, uchrashuvlarda xalqlar o'rtasidagi aloqalarni mustahkamlash, savdo va investitsiyani diversifikatsiya qilish uchun ikki davlatning xavfsizlik sohasidagi sherikligini kengaytirish masalalari muhokama qilinishi kutilyapti.
Bundan tashqari Lu inson huquqlari masalalari bilan shug'ullanuvchi fuqarolik jamiyati a'zolari bilan ham uchrashishi aytilgan.

“AQSh delegatsiyasi Qozog'istonda ham, O'zbekistonda ham Qo'shma Shtatlarning ikki davlat suvereniteti, hududiy yaxlitligi va mustaqilligiga qat'iy sodiqligini yana bir bor tasdiqlaydi”, – deyiladi AQSh Davlat departamenti bayonotida.