Prezident Shavkat Mirziyoev ichki ishlar organlari xodimlari hamda faxriylarini kasb bayrami – O'zbekiston Respublikasi ichki ishlar organlari xodimlari kuni bilan tabrikladi.

Davlat rahbari o'z tabrigida tizim xodimlarining zimmasidagi muhim vazifalarni e'tirof qilib, so'nggi yillarda ichki ishlar organlarini chinakam xalqchil tuzilmaga aylantirish yo'lida qator islohotlar amalga oshirilayotganini ta'kidlaydi.
“Biz Yangi O'zbekiston sharoitida “Barcha islohot va o'zgarishlar – inson qadrini yuksaltirish uchun” degan ezgu tamoyilga sodiq qolgan holda, shu yo'lda boshlagan ishlarimizni yangi bosqichga ko'tarishimiz zarur. Bu borada o'tgan davrda jinoyatchilikka qarshi kurashish sohasida yaratilgan mustahkam huquqiy bazaga tayanamiz”, – deydi Mirziyoev.

Shuningdek, tabrikda ichki ishlar organlari sohasiga raqamli texnologiyalar, xorijiy mamlakatlarning ilg'or tajribalariga asoslangan zamonaviy ish yuritish vositalari, sun'iy intellekt yordamida faoliyat ko'rsatadigan axborot-ma'lumot tizimlari jadal tatbiq etilayotgani hamda jamoat joylarini onlayn kuzatish, murojaatlarni masofadan turib qabul qilish, huquqbuzarliklarni inson omilisiz qayd etish amaliyoti bu boradagi muhim qadamlardan ekani qayd etiladi.

“Ichki ishlar organlari faoliyatini takomillashtirish, aholi osoyishtaligini ta'minlashga qaratilgan ishlarimiz bundan buyon ham izchil davom ettiriladi.
Xususan, ichki ishlar organlari tomonidan ko'rsatilayotgan davlat xizmatlarining 80 foizi elektron shaklga o'tkazilib, tizimda byurokratiya va fuqarolarni sarson qilish holatlari bartaraf etiladi. Har bir faoliyat yo'nalishi bo'yicha ijtimoiy fikrni o'rganish va jamoatchilik tomonidan monitoring qilib borish amaliyotini “mahalla – tuman – viloyat – respublika” tamoyili asosida tashkil etish choralarini ko'rishimiz lozim.

Muxtasar aytganda, ichki ishlar tizimidagi islohotlarimizning amaliy natijasini sohaning har bir xodimi, birinchi navbatda, xalqimiz o'z kundalik hayotida sezishi shart”, – deydi davlat rahbari.

Prezident tabrik so'ngida soha xodimlari va faxriylariga fidokorona mehnatlari uchun samimiy minnatdorlik bildiradi.

“Sizlarni bugungi qutlug' bayram bilan yana bir bor chin dildan tabriklab, barchangizga mustahkam sog'liq, oilaviy baxt, mas'uliyatli xizmatingizda yangi muvaffaqiyatlar tilayman”, – deydi Shavkat Mirziyoev.