Shavkat Mirziyoev Qasim-Jomart Toqaevning taklifi bilan Turkiy davlatlar tashkiloti Davlat rahbarlari kengashining navbatdagi yig'ilishida ishtirok etish uchun 2-3 noyabr' kunlari amaliy tashrif bilan Ostona shahrida bo'ladi.

Sammit kun tartibidan tashkilot doirasidagi ko'p tomonlama hamkorlikni, eng avvalo, savdo-iqtisodiyot, investitsiya, transport-kommunikatsiya, ekologiya, madaniy-gumanitar va boshqa sohalarda yanada rivojlantirish masalalari o'rin olgan.

Delegatsiyalar rahbarlari xalqaro siyosat va mintaqaviy hamkorlikning dolzarb masalalari yuzasidan ham fikr almashadilar. Tadbirlar yakunida qator qo'shma hujjatlar qabul qilinishi ko'zda tutilgan.

Eslatib o'tamiz, joriy yilda Turkiy davlatlar tashkilotiga O'zbekiston raislik qilyapti va tashkilotga raislik doirasida a'zo davlatlar o'rtasida hamkorlikni yanada chuqurlashtirishga qaratilgan 100 dan ortiq muhim tadbir o'tkazildi.

Ma'lumot uchun, tashkilotga O'zbekiston, Ozarbayjon, Qozog'iston, Qirg'iziston va Turkiya a'zo davlatlar, shuningdek, Vengriya va Turkmaniston esa kuzatuvchi maqomidagi davlatlar hisoblanadi.