Toshkent shahrida yirik xalqaro tadbir - Iqtisodiy hamkorlik tashkilotining 16-sammiti boshlanadi.

Sammitda O'zbekiston Prezidenti Shavkat Mirziyoev, Ozarbayjon Prezidenti Ilhom Aliev, Eron Prezidenti Ibrohim Raisiy, Qirg'iziston Prezidenti Sadir Japarov, Tojikiston Prezidenti Emomali Rahmon, Turkmaniston Prezidenti Serdar Berdimuhamedov, Turkiya Prezidenti Rejep Tayyip Erdog'an, Qozog'iston Bosh vaziri Alixan Smailov, Pokiston muvaqqat hukumati rahbari Anvar ul-Haq Kakar hamda IHT bosh kotibi Xusrav Noziriy ishtirok etadi.

“Bugun, shuningdek, delegatsiyalar Toshkentga kela boshlaydi. Prezident Shavkat Mirziyoev ularning rahbarlari bilan ikki tomonlama uchrashuvlar o'tkazadi. Jumladan, bugunga Qirg'iziston, Turkiya Prezidentlari, Pokiston muvaqqat hukumati rahbari va IHT bosh kotibi bilan muzokaralar rejalashtirilgan”, – deb xabar bermoqda Prezident matbuot kotibi Sherzod Asadov.

Ertaga, 9-noyabr kuni esa oliy darajadagi yig'ilish bo'lib o'tadi. Uning doirasida qator ikki tomonlama uchrashuvlar o'tkazilishi ko'zda tutilgan.

Ma'lumot uchun, ayni vaqtda Toshkent shahrida Iqtisodiy hamkorlik tashkiloti 16-sammiti arafasida beshinchi biznes-forum ish boshladi.

Mazkur anjuman savdo siyosatini liberallashtirish va uyg'unlashtirish, biznes yuritish uchun xarajatni kamaytirish, moliya infratuzilmasi va institutsional salohiyatni rivojlantirish, savdo tartib-tamoyilini soddalashtirishga xizmat qiladigan yirik tashabbuslar maydoniga aylanishi kutilyapti.