USAID O'zbekiston bilan global sog'liqni saqlash, boshqaruv va iqtisodiy o'sish bo'yicha hamkorlikni kuchaytirish uchun qo'shimcha 14,2 million dollar ajratadi.
Bu haqda tashkilot administratori Samanta Pauer Toshkentga tashrifi chog'ida ma'lum qilgan.

Qayd etilishicha, USAID besh yillik tashabbus sanalgan “Sildan xoli O'zbekiston” dasturini ishga tushirib, u orqali keng qamrovli qo'llab-quvvatlash xizmatlarini taqdim etish va mamlakat bo'ylab silga qarshi asosiy xizmatlardan foydalanish imkoniyatini oshirish maqsadida qo'shimcha 3,2 million dollar sarmoya kiritadi. Tashkilot bu borada 2002 yildan beri O'zbekistonga qariyb 60 million dollar sarmoya kiritgan.

Shuningdek, 4 million dollarlik sarmoya O'zbekistonning kelajakdagi tahdidlar, epidemiyalar va pandemiyalarga chidamliligini oshirish uchun eng yaxshi tajriba va Covid-19 chora-tadbirlaridan olingan saboqlarga yo'naltiriladi. Qolaversa, ushbu mablag' O'zbekistonga laboratoriya va kuzatuv tizimlarini favqulodda vaziyatlarga tayyorgarligini, xavf-xatarlar chog'ida aloqa bog'lash va jamoatchilik bilan hamkorlikni kuchaytirish imkonini beradi.

Biznes va xususiy sektorni mustahkamlash masalalari uchun esa 3,5 million dollar sarmoya kiritiladi. Ushbu dastur ish o'rinlari yaratish, iqtisodiy inklyuzivlikni yaxshilash, kichik va o'rta korxonalar uchun eksport bozorlarini rivojlantirish va kapitalni jalb qilish imkonini berishi ta'kidlanadi.

O'zbekistonning 2030 yilgacha bo'lgan strategiyasini qo'llab-quvvatlagan holda hamda Kongress bilan hamkorlikda USAID yangi mahalliy boshqaruv dasturi orqali O'zbekistonda viloyat va mahalliy boshqaruvni kuchaytirish uchun 3,5 million AQSh dollari miqdorida mablag' ajratadi. Bu orqali USAID viloyat va mahalliy hokimiyatlar yanada e'tiborli, xalq bilan birgalikda ishlovchi va mas'uliyatli bo'lishi hamda o'zbek xalqiga davlat xizmatlarini yaxshiroq ko'rsatish imkoniyatiga ega bo'lishini ko'zlaydi.