Bloomberg: Navoiyda oltin ishlab chiqarish keskin oshirilyapti
Bloomberg nashrining yozishicha, Navoiy kon-metallurgiya kombinati (NKMK) kelgusi besh yil ichida oltin ishlab chiqarish hajmini 30 foizga oshirishni rejalashtirmoqda. Qayd etilishicha, bu qadam kompaniyaning dunyodagi yetakchi oltin ishlab chiqaruvchilar orasidagi mavqeini yanada mustahkamlaydi.
Ma'lumotlarga ko'ra, NKMK 2030 yilga kelib 4 million untsiya oltin ishlab chiqarishni rejalashtirgan. Bu reja 2025 yilda boshlangan rivojlantirish dasturi doirasida amalga oshiriladi. Dastur har yili 600 million dollargacha investitsiya kiritishni nazarda tutadi.
Kompaniya 2024 yilda 3,1 million untsiya oltin ishlab chiqarib, o'zining ilgarigi rejasini bajargan va shu bilan Rossiyaning Polyus PJSC kompaniyasidan o'zib, jahondagi to'rtinchi yirik ishlab chiqaruvchiga aylangan.
NKMK, shuningdek, London va Toshkent fond birjalarida IPO (ommaviy aktsiya chiqarish) o'tkazish imkoniyatini ko'rib chiqmoqda. Bu jarayonda kompaniya Citigroup Inc., Morgan Stanley va JPMorgan Chase & Co. banklari bilan hamkorlik qilmoqda. Bloomberg manbalariga ko'ra, NKMK 20 milliard dollar atrofida baholanishi mumkin.
Kompaniyaning yangi rivojlanish dasturi doirasida Muruntau ochiq konini kengaytirish hamda yiliga 30 million tonna ruda qayta ishlash quvvatiga ega yangi korxona qurish rejalashtirilgan.
Maqolaga baho bering
0/50
0
0
0
0