“Biz allaqachon insoniyatning eng yirik fojialaridan biri – Orol dengizi qurishi oqibatlarini boshdan kechirmoqdamiz.

Biz suv resurslarini tejash maqsadida irrigatsiya tizimlarini betonlashtiryapmiz. Suvni tejaydigan texnologiyalarni ishlab chiqarish bo'yicha sanoat bazasini yaratdik, sug'oriladigan yerlarning deyarli yarmida ana shunday texnologiyalarni joriy etdik. (Bu salkam ikki million gektar yer maydoni demakdir). Bunday chora-tadbirlar natijasida o'tgan yili 8 milliard metr kub suvni tejashga muvaffaq bo'ldik”, – dedi Shavkat Mirziyoev.

O'zbekiston yetakchisi tomonlarni Markaziy Osiyoda suvni tejaydigan texnologiyalarni joriy etish borasidagi sa'y-harakatlarni birlashtirish va bu sohada mintaqaviy dasturni ishga tushirishga chaqirdi.

Bu rejalarning barchasini ekspertlar muhokamasidan o'tkazish uchun Orolbo'yi mintaqasida xalqaro forum o'tkazish maqsad qilingani ta'kidlandi.

Shuningdek, muzliklarning holati va mintaqadagi tog' ekotizimlarida yuzaga kelishi mumkin bo'lgan xavf-xatarlarni oldindan baholash uchun sun'iy yo'ldosh orqali uzluksiz kuzatuvlarni yo'lga qo'yish bo'yicha “Kopernik” dasturi doirasida Yevropa Ittifoqi bilan yaqin hamkorlikka umid bildirildi.

“Toshkentdagi “Yashil universitet” bazasida yaratilgan Iqlim rezidentsiyasi Markaziy Osiyoda kechayotgan iqlim jarayonlarini o'rganish va monitoring qilish bo'yicha umumiy ilmiy-ekspertlik platformasi bo'lib xizmat qilishi mumkin.

Bundan tashqari, ertaga Nukus shahrida mintaqamizning ekologik muammolariga san'at sohasidagi loyihalar orqali e'tiborni jalb etishga qaratilgan Orol madaniyat sammiti o'z ishini boshlaydi”, – dedi Shavkat Mirziyoev.