Uchrashuv Tramp va Zelenskiyning matbuot anjumani bilan boshlandi, unda ikki davlat delegatsiyalari a'zolari ham ishtirok etdi. Trampning jurnalistlarga aytishicha, AQSh va Ukraina foydali qazilmalar bo'yicha kelishuv tuzmoqchi, u buni «juda adolatli bitim» deb atagan. «Va biz noyob yer metallarining bir qismini olish uchun qazish, qazish, qazish va ishlashni boshlash imkoniyatini intiqlik bilan kutmoqdamiz», — dedi AQSh prezidenti.

Trampning qo'shimcha qilishicha, AQSh «Rossiya bilan juda yaxshi muzokaralar olib borgan» va Rossiya prezidenti Vladimir Putin bilan suhbatlashgan. «Biz o'limlar to'xtashini istaymiz va astoydil mehnat qilamiz… Umid qilamanki, meni tinchlikparvar sifatida eslashadi… Bu juda xavfli vaziyat, u uchinchi jahon urushiga olib kelishi mumkin. Hammasi noto'g'ri yo'nalishda ketayotgan edi…», — dedi Tramp.

Zelenskiy, o'z navbatida, kelishuv «Ukraina uchun haqiqiy xavfsizlik kafolatlari sari birinchi qadam» bo'lishiga umid bildirdi. «Biz Amerika qo'llab-quvvatlashni to'xtatmasligiga ishonamiz, bu biz uchun haqiqatan ham juda muhim… Putinni to'xtatish uchun sizning qat'iy pozitsiyangizga juda ishonaman», — dedi Ukraina rahbari. U Putinni «qotil va terrorchi» deb atadi va «qotil bilan bizning hududlarimizda murosa bo'lmasligi kerakligini» qo'shimcha qildi.

Tramp bunga keyinroq «murosasiz bitimlar tuzish mumkin emas», shuning uchun Zelenskiy «ba'zi murosalarga borishiga to'g'ri keladi, lekin umid qilamanki, ular ba'zilar o'ylaganchalik katta bo'lmaydi», deb javob berdi. Jurnalistlar Trampdan AQSh Ukraina uchun xavfsizlik kafolatlarini ta'minlaydimi, deb so'raganida, u bu haqda gapirishdan bosh tortdi va agar tomonlar tinchlik bitimi tuzsa, urush tugashini aytdi. «Rossiya [urushga] qaytishni istamaydi, hech kim qaytishni istamaydi», — dedi AQSh prezidenti.

Zelenskiy bunga javoban «biz o't ochishni to'xtatish haqida gapira olmaymiz», chunki u xavfsizlik kafolatisiz «ishlamaydi», deb e'tiroz bildirdi. «2014 yildan beri Putin o't ochishni to'xtatish shartlarini 25 marta buzdi… Shuning uchun biz hech qachon o't ochishni to'xtatishning o'zinigina qabul qilmaymiz», — dedi Ukraina prezidenti.

Ishonch.uz