“Биллинг базаси”даги хатоликдан Пахтачилик Узоқовлар хонадони ташвишга тушиб қолди. Сув қувури жумрагини бураса бурамаса шақиллатиб пул санаётган бу матоҳ оилани қарзга ботириб ташлади. “Самарқанд сув таъминот” АЖ Пахтачи туман филиали мутахассисларига қилинган мурожаат бесамар кетди. Сувчиларнинг қўл силташи бу оилани жиддийроқ қадамларни ташлашга мажбурлагани ҳам рост. Йўқ жойдан чиққан сув ғалваси оқибати яхшиликка олиб келмаслигини энг аввало хонадон бекаси ҳис қилди. У Ўзбекистон касаба уюшмалари Федерацияси қошидаги хотин-қизлар муаммолари билан ишловчи 1211 “Ишонч телефони”га арзи-ҳол қилди.

– Касаба уюшмалари кўмагида гарданимизга юкланиб қолган асоссиз қарздорлик бартараф этилди,–дейди Феруза Усмонова.– Ҳозирги вақтда 2 нафар фарзанд тарбияси билан машғулман. Аслини олганда арзимаган муаммон Тошкентгача кўтариб чиқиш уят, Аммо иложсиз қолдик. “Емаган сомса”га пул тўлаш малол келди. Касаба уюшмалари ташвишимизни тўғри тушинди. Чин дилдан ёрдам қилди. Қанча вақтдан буён елкамиздан босиб турган зил замбил юкни бартараф этишга астойдил киришди. Инсон қадрини улуғловчи бу ташкилотдан беҳад миннатдормиз.

Муаммонинг майда-чуйдаси бўлмайди. Самарқандлик Замира Хўжамуродова ҳам “Инсон ижтимоий хизматлар макази”га қатнаб оёғи қаварганлардан. У фарзандлари Ҳасан ва Ҳусан Эргашевларни имтиёзли спорт секцияларида чиниқишини истарди. Унинг илтимослари марказ мутасаддилари томонидан беэътибор қолдирилди. Устига устак марказ ходимининг алдаб юриши юрагига симдек ботди. Муаммосини касаба уюшмаларининг 1211 “Ишонч телефони”га етказди. Ишга жамоат ташкилоти аралашуви билан Самарқанд шаҳар “Инсон ижтимоий хизматлар маркази” кўмагида Ҳасан-Ҳусанлар шаҳардаги 2-сон спорт мажмуасида параспортнинг енгил атлетик турига йўналтирилди.

– Касаба уюшмалари кўмагида спорт оламига кириб келган фарзандларим руҳиятида катта ўзгариш сезаяпман,–дейди З.Хўжамуродова.–Кимларгадир арзимасдек кўринган биз дуч келган муаммонинг оғриқларини бошдан ўтказганларгина ҳис қилади. Энг ёмони кимдандир кўмак сўрасанг-у унинг терс ўгрилиб олгани одамга ёмон тасир қиларкан. Бахтимизга касаба уюшмалари сингари халқнинг дардига малҳам бўлишга шай турган ташкилотлар бор. Улар бир гапингни икки қилмасдан дарров сени тушинаркан. Бунга мен ва менга ўхшаб кўмак олган минглаб юртдошларимиз шоҳид бўлишаяпти.

Кўрдингизки кимларгадир арзимас кўринган юқоридаги воқеликлар ортидан инсон азият чекаяпти. Уларни эшитиш, ёнида туриш эса ҳар биримизга ҳам қарз ҳам фарздир.

Нурилла Шамсиев, Ishonch.uz