Ўзбекистон Президенти Шавкат Мирзиёев 30 июнь – Ёшлар куни муносабати билан Ўзбекистон ёшларига байрам табригини йўллади.

Давлат раҳбари ўз табригида “Янги Ўзбекистон келажагини бутун эл-юртимиз қатори” азму шижоатли ёшлар билан боғлиқ ҳолда кўришини таъкидлайди.

Шу боис, ёшларнинг ҳуқуқ ва манфаатларини таъминлаш, уларни камол топтириш давлат сиёсатининг энг устувор йўналишларидан бири сифатида доимо эътибор марказида бўлиб келаётганига урғу беради. Сўнгги йилларда мамлакатда ёшлар билан ишлаш бўйича дунёда ўхшаши кам бўлган вертикал бошқарув тизими яратилганини, бу эса тизимдаги кўплаб масалаларни қуйи бўғиннинг ўзида ҳал этиш имконини бераётганини айтади.

“Айниқса, “Ёшлар дафтари”, “Ёшлар баланси” платформаси асосида олиб бораётган кенг кўламли ишларимиз натижасини ўғил-қизларимиз ўз ҳаётида аниқ ҳис этмоқда”, – дейди давлат раҳбари.

Шавкат Мирзиёевнинг таъкидлашича, биргина ўтган ўқув йилида мактаб ўқувчиларимиздан 55 нафари математика, кимё, биология, физика ва информатика фанлари бўйича нуфузли халқаро олимпиадаларда 8 та олтин, 15 та кумуш, 32 та бронза медалини, маданият ва санъат соҳасидаги нуфузли халқаро танловларда эса ёшларимизнинг 383 нафари бош совринни, 1 минг 359 нафари 1-ўринни қўлга киритган.

“Ёшларнинг мавжуд имкониятлардан унумли фойдаланиб, турли соҳаларда муҳим ютуқларга эришаётгани барчамизни хурсанд қилади”, – дейди Президент.

Қолаверса, Қатарда бўлиб ўтган футбол бўйича Осиё кубоги ўйинларида Ўзбекистон олимпия терма жамоасининг мамлакат тарихида илк бор Олимпиада йўлланмасини қўлга киритганини ғурур ва ифтихор билан эслайди.

“Мана, бизнинг қандай истеъдодли, билимли ва матонатли ёшларимиз бор! “Янги Ўзбекистон ёшлари” деган шарафли номга ҳар томонлама муносиб бўлган бундай йигит-қизлар бизнинг бебаҳо бойлигимиз, олтин фондимиздир”, – дейди давлат раҳбари.

Ўзбекистон Президенти, ўз табриги сўнгида Ўзбекистон ёшларини билимли, истеъдодли, ўзининг кучи ва салоҳиятига ишониб, доимо олдинга интилиб яшайдиган эзгу фазилатлар соҳиблари этиб тарбиялаш учун бундан буён ҳам бор куч ва имкониятлар сафарбар этилишини таъкидлайди.

“Ҳеч қачон унутманг, сизлар ёшликнинг ҳар бир дақиқасини ғанимат билиб, доимо бунёдкорлик ва ижодкорлик ҳисси билан, Ватанга чексиз меҳр ва садоқат туйғуси билан яшасангиз албатта кам бўлмайсиз.

Сизларни бугунги байрам билан яна бир бор табриклаб, ўз олдингизга қўйган мақсадларга эришишда барчангизга сиҳат-саломатлик, бахт-саодат, омад ва зафарлар тилайман.

Байрамингиз муборак бўлсин, азиз ўғил-қизларим!” – дейди Ўзбекистон Республикаси Президенти Шавкат Мирзиёев.