Сенатда ўзбошимчалик билан эгалланган ерларга бўлган ҳуқуқни тиклашга доир ҳужжат маъқулланди
Бугун, 21 июнь куни Сенатнинг навбатдаги ялпи мажлисида “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Қонун маъқулланди.
Қайд этилишича, мазкур қонун ўзбошимчалик билан эгаллаб олинган ер участкалари ҳамда уларда қурилган бино ва иншоотларга бўлган ҳуқуқларни эътироф этиш соҳасидаги муносабатларни тартибга солади.
Қонун билан ер участкаси ва унда қурилган иморатга бўлган ҳуқуқни, шунингдек якка тартибдаги уй-жой қурилган ўзбошимчалик билан эгаллаб олинган ер участкасига ижара ҳуқуқини эътироф этишнинг аниқ тартиблари ҳам белгиланмоқда.
Бундан ташқари, ортиқча эгалланган ер участкасига, боғдорчилик ва узумчилик ширкатлари ҳудудида жойлашган турар жойлар эгаллаган ер участкасига, кичик саноат зоналари ҳудудидаги ер участкасига бўлган ижара ҳуқуқини эътироф этиш асослари белгиланяпти.
Қолаверса, қонунга ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга тааллуқли маълумотлар ва ҳужжатлар автоматлаштирилган ахборот тизими орқали босқичларда киритилиши назарда тутилмоқда.
Муҳокама давомида сенаторлар томонидан Қонуннинг қабул қилиниши фуқаролар ва тадбиркорлик субектларининг ўзбошимчалик билан эгаллаб олган ер участкаларига нисбатан ижара ҳуқуқини ҳамда уларда қурилган бино ва иншоотларга нисбатан мулк ҳуқуқи эътироф этилишига ва бу орқали аҳолининг ижтимоий, иқтисодий ҳамда ушбу бино ва иншоотларни коммунал тармоқларга улаш бўйича тадбиркорлик фаолиятини амалга оширишда юзага келаётган муаммоларининг ҳал этилишига имкон бериши таъкидланди.
Муҳокама якунида мазкур Қонун сенаторлар томонидан маъқулланди.
Эслатиб ўтамиз, аввалроқ эгалик ҳуқуқи йўқ уй-жойларни рўйхатга олиш бўйича ишлар икки йилдан буён якунига етмаётгани ва бу ушбу тоифага кирувчи аҳолининг айрим имтиёзлардан фойдаланишига тўсқинлик қилиб келаётгани ҳақида тўхталган эдик.
Mақолага баҳо беринг
0/50
0
0
0
0