Норасмий хабарларга кўра, бугун – 22 июль куни Тошкент экстремал ультрабинафша нурланиш билан қопланади. Нурланиш чўққиси соат 12:00 дан 18:00 гача кутилмоқда. 23 июлда нурланиш даражаси юқорилигича қолади ва 10 даражага етади. Лекин бу ҳақда об-ҳаво расмий сайтларида ҳозирча бирон маълумот йўқ.

Хўш, ультрабинафша нурланиш нима, унинг таъсири ва оқибатлари қандай?

Ультрабинафша нурлар билан нурланиш – кўринадиган ва рентген нурланиш турлари ўртасида махсус спектрни эгаллаган электромагнит тўлқинларга таъсир қилишдир.

Табиий шароитда ультрабинафша нурларнинг манбаи қуёшдир. Бу нурлар инсонга ҳам ижобий, ҳам салбий таъсир кўрсатиши мумкин. Ортиқча миқдорда нурланиш организм учун хавфли бўлиб, турли касалликларни келтириб чиқаради. Кўп ҳолатда тери зарарланади, нурланиш терининг пигментация жараёнини тезлаштиради. Янги доғлар пайдо бўлишига олиб келади.

Тадқиқотлар ультрабинафша нурланиш терида шиш пайдо қилишини кўрасатади. Бундай реакцияга оксидловчи стресс сабаб бўлиши мумкин. Нурланиш бириктирувчи тўқималарга салбий таъсир қилади. Натижада тери қаттиқ ва эластик бўлишни тўхтатади ва қариш жараёни тезлашади.

Ҳаддан ташқари нурланиш инсон саломатлигига салбий таъсир қилади, шунинг учун шифокорлар тўғридан-тўғри қуёш нури остида бўлмасликни тавсия қилишади. Пляжлар, очиқ дам олиш масканларига ташриф буюрганингизда терини ҳимоя қилиш учун махсус маҳсулотлардан фойдаланиш тавсия этилади.

Баъзи маҳсулотлар танани ультрабинафша нурланишдан ҳимоя қилиши мумкин, деган фикр бор. Бу маҳсулотларга қуюқ шоколад, анор, қизил икра фильеси, помидор, цитрус мевалар қобиғи киради. Ичимликлардан эса қаҳва ва яшил чой бу ўринда фойдали. Рационда иммунитетни мустаҳкамловчи озиқ-овқатлар, А, C ва Е витаминлари ҳам бўлиши зарур. Д гуруҳи витаминларини вақтинча чеклаш фойдалироқдир.