“Chinobod plaza” санаторийсида ўтаётган тадбирда Қудратилла Рафиқов қуйидагиларга тўхталиб ўтди:

— Бугун Янги Ўзбекистоннинг янги касаба уюшмаларида фидокорона меҳнатлари, соҳа ривожига қўшаётган ҳиссаси ҳамда эришган ютуқлари билан жонбозлик кўрсатиб келаётган бир гуруҳ соҳа ходимларини сизларнинг иштирокингизда тақдирлашни ният қилганмиз.
Мен сизларнинг ижозатингиз билан яна бир таклифни куни кеча мамлакатимизда бўлиб ўтган Олий Мажлис ва маҳаллий кенгашларга сайловлар натижаларига кўра, 52 нафар касаба уюшма ходимлари ва фаоллари туман ва шаҳар кенгашларига, 17 нафар ходимимиз Қорақалпоғистон Республикаси Жоқарғи Кенгеси, вилоятлар ва Тошкент шаҳар кенгашларига депутатликка сайланишди.

Биз парламентнинг юқори палатаси Сенатга бўладиган сайловларга ҳам катта умид билан қарамоқдамиз.
Бу эса касаба уюшмаларининг давлат органлари томонидан қабул қилинадиган қарорларнинг халқчил, халқаро талабларга мос бўлишида таъсир кучимизнинг ошаётгани, шу билан бирга халқнинг ташкилотимизнинг фаолиятига бўлган ишончи, эътибори ва ҳурматидан далолатдир.

Қудратилла Рафиқов:
- Жамиятда касаба уюшмалари аъзолари сонини, фаолиятнинг сифат ва самарадорлиги кўрсаткичларини ошириш, ходимларнинг муносиб меҳнат шароитлари ва ҳақ-ҳуқуқларини ҳимоя қилишнинг янада ҳаётбахш йўллари ва форматларини жорий қилиш ҳамда бошқа кўплаб йўналишларда таклифлар ишлаб чиқилган ва уларни рўёбга чиқариш борасида малакали мутахассисларимиз иш олиб боришмоқда.

Агар эътибор бераётган бўлсаларингиз матбуотда, айниқса, ўзимизнинг «Ишонч» ва «Ишонч-Доверие» газеталарида «Ўзбекистон касаба уюшмаларининг 120 йиллиги» деган янги рукн очилди. Гап фақат касаба уюшмаларининг қачон пайдо бўлганида ҳам эмас. Гап мана шу узоқ йиллик тарихда муносиб ҳисса қўшган соҳанинг заҳматкаш вакилларини эслаш, уларга ўз ҳурматимизни изҳор этиш, бир сўз билан айтганда, ўз ҳамкасбларимизни эъзозлаш, уларнинг ҳурматини жойига қўйиш ҳақида бормоқда.

120 йил, албатта тарих олдида кичкина бир вақт, аммо ўтган мана шу тарихан қисқа вақтда юртимизда бу соҳа фидойилари амалга оширган ишларнинг кўлами жуда катта экани яққол кўриниб турибди. Бу йиллар давомида турли бошқарув форматларида ишлаган бўлсакда, соҳа ходимлари ҳамиша меҳнаткаш халқнинг ҳуқуқини таъминлаш, унга муносиб меҳнат ва дам олиш шароитлари яратиш борасида тиним билмай меҳнат қилишмоқда.

Мен ўйлайманки, бугун ушбу анжуманимизга таклиф этилган ҳар бир соҳамиз фахрийсининг бу катта тарихда ўз изи бор, муносиб меҳнати, ҳиссаси бор. Шундай экан, бундан буён ҳам касаба уюшмаларининг ҳар бир байрами, тадбири, анжумани тўрида сизлар бўлишингиз адолатдан бўлади. Бу соҳада ишлаётган ёшлар, навқирон авлод учун ҳам бир ибрат бўлади, деб ҳисоблаймиз.