Адлия вазирлиги билан ҳамкорликда LexAI ҳуқуқий чат-боти яратилди.

Унинг биринчи бошланғич функцияси ҳуқуқий масалаларга тезкор жавоб бериш имкониятини тақдим этишдир.

Яқин вақтлар ичида ҳужжат лойиҳаларини экспертизадан ўтказиш – қонунчилик ҳужжатлари лойиҳаларини онлайн баҳолаш, ҳуқуқий амалиётни таҳлил қилиш – фойдаланувчиларнинг берган ҳуқуқий кейсларини таҳлил қилиш орқали жавоб тақдим этиш, лойиҳаларни тайёрлаш – мустақил ҳужжат тайёрлаш конструктори каби йўналишларда ҳам ёрдамчи бўлиши кутилмоқда.

Нега бу лойиҳа муҳим?

Ҳозирги кунда Қонунчилик маълумотлари миллий базасида 48 мингдан ортиқ ҳужжатлар мавжуд бўлиб, амалдаги ҳужжатлар сони – 34 минг, яхлит ҳужжатлар – 28 мингдан, ўзгартириш ва қўшимчалар назарда тутувчи ҳужжатлар – 5 700 дан зиёд.

Чат-ботнинг билимлар базаси 604 миллион белгидан ортиқ бўлиб, платформани яратишда ҳуқуқ ва IТ соҳасидаги тажрибали мутахассислар 5 ойдан ортиқ вақт давомида ишлашди. Шу билан бирга, барча технологиялар Open source манбааларидан фойдаланмасдан, бутунлай мустақил ишлаб чиқилган.
Чат-бот ҳозирда синов режимида ва ҳуқуқшунос-мутахассислар томонидан текширилмоқда. Тез орада барчага очилади!

Ушбу лойиҳа Ўзбекистон фуқароларига ҳуқуқий билимларни янада осон ва тезкор етказиб бериш учун мўлжалланган.