Ҳуқуқни муҳофаза қилиш академиясида 2023/2024 ўқув йилидан бошлаб бакалавриатнинг «Тергов фаолияти» ҳамда юриспруденсиянинг бошқа бакалавриат таълим йўналишларида юридик кадрларни тайёрлаш жорий этилди.

Ҳозирда Академия бакалавриатининг «Тергов фаолияти» йўналишига 2024/2025 ўқув йили учун қабул жараёни давом этмоқда. Ўқишга қабул қилиш очиқлик ва шаффофлик принсиплари асосида ташкил этилган.

Академия фаолиятига қизиққан ота-оналар, лицей битурувчилари кўп. Ушбу даргоҳда илм олишни истаганлар ва уларнинг йиғилиб қолган саволларига жавоб бериш мақсадида “Очиқ эшиклар”куни бўлиб ўтди. Унда Тошкент шаҳри мактаблари ва Юридик техникум битирувчилари, ИИВ ҳузуридаги Тошкент шаҳри ва вилояти академик лисейлари, академия талабаларининг ота-оналари, шунингдек ОАВ вакиллари ташриф буюрдилар.

Меҳмонларни Академия раҳбарияти ва ходимлари, Бош прокуратура вакиллари, ҳуқуқни муҳофаза қилиш органлари фахрийлари қарши олдилар.

— Академиянинг яхши тарафи шундаки, талабалар уч йил давомида “тергов фаолияти” йўналишида бакалавриат дастури бўйича таълим олади ва белгиланган давлат намунасидаги диплом билан тақдирланади. Ўқитиш ўзбек ва рус тилларида, тўлиқ давлат гранти асосида ташкил этилади — дейди Академия ахборот хизмати раҳбари Санобар Мансурова. Битирувчиларга ваколатли давлат органларида иш билан таъминланиши кафолатланади Чунки қабул пайти ҳуқуқни муҳофаза қилувчи органлар учун (ҳудудлар кесимида) зарур кадрлар рўйхатига эътибор қаратилади. Қолаверса, ўқув жараёни амалиёт билан узвий уйғун ҳолда олиб борилади. Яъни, биз кўпинча кузатганмиз, таълим ва амалиёт ўртасида доим катта фарқ бўлган. Битирувчилар амалиётга киришиб кетишга қийналган. Шунинг учун ҳам академияда ўқув модуллари шундай тузилганки, бу жараёнга назариячи олимлар билан бирга амалий тажрибага эга бўлган мутахассислар жалб қилинган.
Тадбир давомида бўлажак талабалар ва ОАВ ходимлари криминалистика хонаси, суд имитацияси хонаси, экспертиза лабораторияси ва бошқа амалий ҳамда вазиятли машғулотлар ўтказиш учун махсус жиҳозланган хоналарни кўздан кечирдилар. Академиянинг махсус полигонида иштирокчилар тергов-криминалистика тактикалари ва методикаларини амалий қўллаш имитациясида, шунингдек воқеа жойини кўздан кечириш ва жиноятни очишга оид қизиқарли квест мусобақасида иштирок этишди, ушбу синовда ғолиб бўлган зукко ва билимдон ёшларга эсдалик совғалар топширилди.

Республикамизда биринчи бўлиб ташкил этилган Академия DarkVeb киберлабораторияси, шунингдек тергов жараёнларида полиграф (детектор) технологияларини қўллаш, шунингдек мобил криминалистик автолаборатория имкониятлари имкониятлари ёшларда айниқса катта қизиқиш уйғотди.

Битирувчи синф ўқувчилари Академия бакалавриатининг “Тергов фаолияти” ва “Прокурорлик фаолияти” ўқув дастурлари, бакалавриатга кириш ва таҳсил олиш тартибига оид саволларига атрофлича жавоб олишди.

Академиянинг тергов фаолияти йўналиши бўйича магистратурасига кундузги шаклда ўқишга қабул қилинган ваколатли давлат органлари ходимлари, шунингдек, бошқа мутахассисликлар бўйича магистратуранинг кундузги шаклига ўқишга қабул қилинган прокуратура органлари ходимларини ўқитиш бепул асосда амалга оширилади ҳамда уларнинг эгаллаб турган лавозими ва ўртача ойлик иш ҳақи ўқиш даври мобайнида сақлаб қолинади.

Битирувчи синф ўқувчилари Академия бакалавриатининг “Тергов фаолияти” ва “Прокурорлик фаолияти” ўқув дастурлари, бакалавриатга кириш ва таҳсил олиш тартибига оид саволларига атрофлича жавоб олишди.

Феруза Раҳимова,
Ishonch.uz