Ўзбекистонга шифокорлар етишмаяпти
Миллий статистика қўмитаси маълумотларига кўра, мамлакатда ҳар 10 минг аҳолига 28,6 нафар шифокор тўғри келади. Бир қарашда бу ўртача кўрсаткичдек кўринса-да, мутахассисликлар кесимидаги таҳлил ҳақиқий вазият анча жиддий эканини кўрсатади. Хусусан, энг катта юк терапевт ва педиатрларга тушмоқда. Терапевтлар — 10,8 нафар, педиатрлар эса 0–14 ёшлилар бўйича 8,3, 0–17 ёшлилар бўйича 7,1 нафарни ташкил қилади. Демографик босим юқори бўлган мамлакат учун бу рақамлар аҳоли эҳтиёжига мутлақо мос эмас.
Жарроҳлар етишмаслиги ҳам жиддий муаммо бўлиб қолмоқда — бу йўналишда ҳар 10 минг аҳолига атиги 3,3 нафар мутахассис тўғри келади. Бу амалиётларнинг кечикиши, навбатларнинг ортиши ва тиббий хизмат сифати пасайишига сабаб бўлмоқда. Аёллар саломатлиги йўналишидаги ҳолат ҳам хавотирли: акушер-гинекологлар сони ҳар 10 минг аёлга ҳаммасини ҳисоблаганда 3,2 нафардан ошмайди, бу эса юқори туғилиш кўрсаткичлари шароитида перинатал хавфларни оширади.
Айрим мутахассисликларда вазият янада танг:
офтальмологлар — 0,5,
отоларингологлар — 0,6,
фтизиатрлар — 0,2,
онкологлар — 0,3,
психиатрлар — 0,3
ва невропатологлар — 0,9 нафарни ташкил этади.
Бу соҳалар аҳоли саломатлигида энг муҳим йўналишлар саналса-да, мамлакат миқёсида улар бўйича кадрлар етарли эмас.
Муаммо фақат шифокорлар сонида эмас, балки тизимда: кадрларнинг нотенг тақсимланиши, хорижга кетиш тенденцияси, маошнинг рақобатбардош эмаслиги, хусусий секторга ўтиш ва айниқса қишлоқ ҳамда туманларда кадрлар етишмаслиги ҳолатни янада оғирлаштирмоқда. Мутахассислар фикрича, бу соҳада муаммоларни ҳал этиш учун шифокорлар маошини ошириш, тиббиёт кадрларини тайёрлаш жараёнларини қайта кўриб чиқиш ва давлат даражасида узоқ муддатли кадрлар стратегиясини ишлаб чиқиш зарур.
Долзарб мавзулар
Mақолага баҳо беринг
0/50
0
0
0
0