Transport vaziri temir yo'l, havo transporti va avtobus qatnovlari haqida ma'lumot va chipta olish imkonini beradigan yagona onlayn platforma yaratish hamda tajriba-sinov tariqasida amaliyotga tatbiq etishga doir hujjatni imzoladi.

Vazir imzolagan buyruqqa ko'ra, joriy yilning 21-oktyabr kuniga qadar temir yo'l, havo transporti va avtobus qatnovlari haqida ma'lumot va chipta olish imkonini beradigan “E-ticket” yagona multimodal platformasining texnik topshirig'i loyihasi ishlab chiqiladi va joriy yil 20-noyabrgacha mazkur tartib tajriba-sinov tariqasida ishga tushiriladi.

“Uzbekistan Airways” AJ, “O'zbekiston temir yo'llari” AJ 2024-yil 22-oktyabr kuniga qadar platformani ishlab chiqish davomida integratsiya ishlarini amalga oshirish uchun o'z axborot tizimlaridan onlayn chipta sotishni nazarda tutuvchi “API” ma'lumotlarini taqdim etadi.

2024-yil 1-dekabrdan boshlab esa Uztrans axborot tizimida transportning barcha turlari uchun chipta qidirish imkoniyatiga ega modul faoliyati to'xtatiladi.