U bank sektori, xalqaro startaplar va ilmiy izlanishlarni uyg‘unlashtirgan holda, xalqaro miqyosda professional faoliyat olib bormoqda. Biz Azizbek bilan uning kasbiy yo‘li, ilmiy ishlari va kelgusidagi strategik maqsadlari haqida suhbatlashdik.

— Kasbiy faoliyatingiz qanday boshlangan va bank sektoridagi dastlabki tajribangiz nimalardan iborat bo‘ldi?

— Mening professional faoliyatim 2019-yilda “Turonbank”da boshlangan. Bankda kredit portfellarini tahlil qilish, risklarni baholash, moliyaviy rejalashtirish va investitsion strategiyalar ishlab chiqish bilan shug‘ullandim. Bu davr moliyaviy intizom, analitik fikrlash va qaror qabul qilish jarayonlarini chuqur o‘rganishim uchun muhim poydevor bo‘ldi. Bank muhiti real moliyaviy risklarni baholash va amaliy qarorlar ishlab chiqish ko‘nikmalarini shakllantirdi.

— Keyinchalik xalqaro startap muhitida ishlashga o‘tdingiz. Bu bosqich professional rivojlanishingizga qanday ta’sir ko‘rsatdi?

— 2021–2023-yillarda Londonda joylashgan “Cloud Kitchens” startapida moliyaviy tahlilchi sifatida ishladim. Asosiy vazifalarim byudjetlashtirish, pul oqimlarini boshqarish, moliyaviy prognozlash va xarajatlarni optimallashtirishdan iborat edi.

Joriy etilgan tahliliy metodologiyalar natijasida kompaniyada qarzdorlik darajasi 17 foizga kamaydi, prognoz aniqligi oshdi hamda likvidlik ko‘rsatkichlari sezilarli yaxshilandi.

Shuningdek, Yevropa (Buyuk Britaniya, Fransiya, Italiya) va Yaqin Sharq (Kuvayt, BAA, Saudiya Arabistoni) bozorlarida moliyaviy tizimlarni modernizatsiya qilish loyihalarida ishtirok etdim. Bu tajriba global moliya bozorlarining institutsional farqlari va risk modellari bilan ishlash ko‘nikmalarimni kengaytirdi.

— Siz amaliy faoliyat bilan bir qatorda ilmiy izlanishlar bilan ham shug‘ullanasiz. Ilmiy faoliyatingiz haqida gapirib bersangiz.

— Ilmiy izlanishlarimni professional amaliyot bilan parallel ravishda olib boraman. O‘zbekistonlik professorlar bilan hamkorlikda “Strategic Corporate Finance and Investment Banking with Integrated Risk and Portfolio Management” nomli akademik qo‘llanma hammuallifi bo‘ldim.

Shuningdek, fiskal barqarorlik, investitsion strategiyalar va risk menejmenti bo‘yicha bir qator ilmiy maqolalarim nashr etilgan. Tadqiqotlarimdan biri — “Financial Analysis of Revenue Concentration and Fiscal Sustainability in Uzbekistan” — xalqaro ilmiy hamjamiyatda e’tirof etilib, “Best Publication” mukofotiga sazovor bo‘lgan.

Ilmiy faoliyatimning asosiy yo‘nalishi — davlat moliyasi, fiskal risklar va investitsiya portfellarini optimallashtirishdir.

— Hozirgi akademik faoliyatingiz va professional tayyorgarligingiz haqida nimalar deya olasiz?

— Hozirda AQShdagi Golden Gate University’da CFA dasturiga asoslangan moliya bo‘yicha magistratura bosqichida tahsil olyapman. CFA dasturi global moliya bozorini tizimli tahlil qilish, institutsional investitsiya strategiyalarini ishlab chiqish va professional etik standartlarni o‘zlashtirish uchun muhim platforma hisoblanadi.

Bu ta’lim dasturi menga moliyaga strategik va ilmiy yondashuvni chuqurlashtirish imkonini bermoqda.

— Kelajakdagi professional strategik maqsadlaringiz qanday?

— Kelgusida xalqaro investitsion va moliyaviy loyihalarda yetakchi mutaxassis sifatida faoliyat yuritishni, so‘ngra to‘plangan tajribani O‘zbekiston moliya tizimi rivojiga yo‘naltirishni rejalashtirmoqdaman. Ayniqsa, fiskal barqarorlik, diversifikatsiya va risk boshqaruvi bo‘yicha ilgari surgan ilmiy yondashuvlarimni amaliyotga tatbiq etish muhim deb hisoblayman.

Bugungi kunda xalqaro mutaxassislar va akademik hamjamiyat tomonidan berilayotgan ijobiy baholar mening professional mas’uliyatimni yanada oshirmoqda.

— Xalqaro miqyosda faoliyat yuritishni istayotgan yosh mutaxassislarga qanday tavsiyalar berasiz?

— Uch asosiy tavsiyam bor:

Birinchidan, bilimga sarmoya kiritish — eng yuqori rentabellikga ega investitsiyadir.

Ikkinchidan, tajribani ustuvor qo‘yish — professional o‘sishning muhim bosqichi.

Uchinchidan, qat’iyat va o‘ziga ishonch — global professional muvaffaqiyatning asosiy omillaridir.

“Imkoniyatlar tashqaridan kelmaydi — ularni izlash va yaratish kerak,” — deya suhbatni yakunlaydi Azizbek To‘xtabayev.

Azizbek Toxtabaev — xalqaro tajriba, ilmiy qarash va aniq maqsadga ega yangi avlod moliyachilaridan. Uning yo'li shuni ko'rsatadiki, reja, mehnat va qat'iyat bo'lsa, o'zbekistonlik mutaxassis uchun global moliya bozorini zabt etish muammo emas.

Adhamjon Qodirov suhbatlashdi