Parij shahrida bo'lib o'tgan muzokaralar yakunida Prezident Shavkat Mirziyoev va Emmanuel Makron Strategik sheriklik o'rnatish to'g'risidagi qo'shma deklaratsiyani qabul qildilar.

Shuningdek, davlat rahbarlari huzurida:

• Mutaxassislar va talabalar harakatchanligi to'g'risidagi hukumatlararo bitim;
• diplomatik pasport egalarini viza talablaridan o'zaro ozod qilish to'g'risidagi hukumatlararo bitim;
• Fransiyaning yetakchi kompaniyalari bilan O'zbekistonda 6,5 milliard yevrolik istiqbolli kooperatsiya loyihalarini amalga oshirishni nazarda tutuvchi Investitsiya va innovatsiya sohalaridagi hamkorlik dasturi;
• O'zbekiston-Fransiya universitetini tashkil etish to'g'risida hukumatlararo bitim;
• readmissiya to'g'risida hukumatlararo bitim;
• tashqi ishlar vazirliklarining 2025-2026 yillarga mo'ljallangan hamkorlik dasturi;
• 2026-2030 yillarda Fransiya taraqqiyot agentligi bilan hamkorlik dasturi;
• xalqaro tashkilotlar doirasidagi hamkorlik to'g'risida deklaratsiya;
• sog'liqni saqlash sohasida hamkorlik to'g'risida deklaratsiya;
• frantsuz tilini o'qitishni kengaytirish to'g'risida bayonnoma;
• musiqa, kino va teatr sohalarida hamkorlik to'g'risida deklaratsiya;
• Madaniyat va san'atni rivojlantirish jamg'armasi bilan Frantsiya Madaniyat vazirligi, Madaniy meros milliy instituti va Markaziy Osiyo tadqiqotlari instituti o'rtasidagi hamkorlik bitimlari;
• Frantsiyaning voltalia kompaniyasi O'zbekistonda quyosh, shamol stantsiyalari va energiya saqlash tizimlaridan iborat gibrid klaster uchun elektr energiyasi sotish bo'yicha 25 yillik shartnoma;
• «Navoiyuran» davlat korxonasi bilan Fransiyaning Orano kompaniyasi o'rtasida Janubiy Jongeldi konini o'zlashtirish bo'yicha investitsiya loyihasini amalga oshirish bo'yicha bitim. Loyihaning investitsiya qiymati birinchi bosqichda 214 mln dollar;
• SUEZ kompaniyasi bilan «Surxondaryo viloyatining ichimlik suv ta'minotini modernizatsiya qilish» loyihasining birinchi bosqichi bo'yicha muhim hujjat – Termsheet (shartnomaning asosiy shartlari);
• Toshkent va Parij shaharlari o'rtasida sheriklik munosabatlarini o'rnatish to'g'risida bayonnoma va boshqa ikki tomonlama hujjatlar ham imzolandi.

Jurnalist Aziza Qurbonovaning yozishicha, o'zaro almashilgan hujjatlar orasida, jumladan, Toshkent shahar hokimi o'rinbosari Sharof Rahmonov va Fransiya tashqi savdo va xorijdagi fuqarolar bo'yicha vazir-delegat Loran Sen-Marten imzolagan Toshkentda tramvay tizimini amalga oshirish bo'yicha yo'l xaritasi ham bor.