Ehtiyojmand oilalardagi ayollar uchun grantlar soni ikki barobar ko'payadi
Shavkat Mirziyoev oliy ta'lim muassasalarida tahsil olayotgan qizlar soni 904 ming nafardan oshib, jami talabalarning 54 foizini tashkil etayotganini ma'lum qildi.
O'tgan yili 60 nafar qizimiz dunyoning eng nufuzli oliy ta'lim muassasalariga o'qishga kirishga muvaffaq bo'lgan.
Shuningdek, stajyor-tadqiqotchilar va doktoranturada tahsil olayotganlarning 8,5 ming nafari, ya'ni 61 foizini xotin-qizlar tashkil etmoqda.
Prezidentimiz Kegeyli tumanidan Indira Satniyyazova, buxorolik vazira Fayzullaeva hamda navoiylik Mashhura Qudratovaning xalqaro fan olimpiadalarida erishgan yutuqlarini alohida e'tirof etdi. Shuningdek, bir qator xalqaro startap tanlovlari g'olibi bo'lgan buvaydalik Dilafruz Jo'raboeva nufuzli “Microsoft” kompaniyasining O'zbekistondagi elchisi sifatida tan olingani ham ta'kidlab o'tildi.
Yangi o'quv yilidan boshlab ehtiyojmand oilalardagi ayollar uchun davlat granti kvotasi ikki barobar oshirilib, 4 mingtaga yetkazilishi belgilandi.
Shuningdek, Top-300 talikdagi oliy ta'lim muassasalari bilan qo'shma ta'lim asosida magistratura bosqichida tahsil olayotgan talaba-qizlarning kontrakt to'lovlari ham davlat tomonidan qoplab beriladi.
Maqolaga baho bering
0/50
0
0
0
0