“Dunyo” axborot agentligining ma'lum qilishicha, uchrashuvlarda ikki tomonlama hamkorlikning bugungi holati va istiqbollari muhokama qilingan. Jumladan, ikki mamlakat o'rtasida parlamentlararo hamkorlikni rivojlantirish, hududlararo aloqalarni faollashtirish, savdo, transport yo'laklari, “yashil” iqtisodiyot va boshqa masalalar ko'rib chiqilgan.

Tomonlar ikki davlatning siyosiy, savdo-iqtisodiy doira vakillari o'rtasidagi aloqalar faollashganini qayd etib, davlatlararo hamkorlikning asosiy yo'nalishlarini amalga oshirish uchun samarali shartnomaviy-huquqiy bazani yaratish bo'yicha ishlarni davom ettirish zarurligini ta'kidladilar.

O'zbekiston va Polsha parlamentlarining sarmoyalarni jalb etish, iqtisodiyotning turli tarmoqlari o'rtasidagi aloqalar ko'lamini kengaytirish, ta'lim va texnologiyalar sohasidagi hamkorlikni mustahkamlash borasidagi imkoniyatlaridan keng foydalanish masalalari xususida fikr almashildi.

Seym spikeri o'rinbosari Kshishtof Bosak O'zbekiston tomoniga Polsha parlamenti bilan konstruktiv muloqot, o'zaro manfaatli munosabatlarni mustahkamlash tarafdori ekanligi uchun minnatdorlik bildirdi. Parlament a'zosining aytishicha, so'nggi paytlarda YeIda iqlim bo'yicha kun tartibi mustahkamlangan va a'zo mamlakatlardagi ishlab chiqaruvchilar uchun turli to'lovlar joriy etilgan.

Senat vitse-marshali Mixal Kaminskining ta'kidlashicha, Polsha ikki davlat manfaatlarini hisobga olgan holda O'zbekiston bilan o'zaro manfaatli hamkorlikni yanada chuqurlashtirish tarafdoridir. Shu nuqtai nazardan, O'zbekistondagi barqarorlik Markaziy Osiyoda iqtisodiy o'sish va integratsiya jarayonlarini faollashtirishning kaliti hisoblanadi.

“Markaziy Osiyo davlatlarida barqaror xavfsizlikni ta'minlash Pol'sha tomoni manfaatlariga to'liq javob beradi”, – deydi u.

Pol'sha tomoni joriy yilning mart oyida Toshkent – Varshava to'g'ridan-to'g'ri havo qatnovlarini yo'lga qo'yilishi O'zbekiston-Polsha hamkorligini ijtimoiy-iqtisodiy, madaniy-gumanitar sohalarda kengaytirishda muhim ahamiyat kasb etishini qayd etdi.