Tadbirda O'zbekiston kasaba uyushmalari Federatsiyasining Toshkent shahar Kengashi, Mehnat va ijtimoiy munosabatlar akademiyasi, Federatsiya tasarrufidagi “Yakkasaroy sport sog'lomlashtirish majmuasi” Mas'uliyati cheklangan jamiyati, Xalqaro Shaxmat Akademiyasi mutasaddilari, shaxmat sohasi ustalari, jamoatchilik vakillari va talaba-yoshlar ishtirok etdilar.

Mazkur “Shaxmat maktabi” ham aholi, ayniqsa, o'quvchi yoshlar o'rtasida shaxmat o'yinini keng targ'ib etish bilan birga, yigit-qizlar orasidan shaxmat o'yiniga qiziquvchi yosh iqtidorlarni aniqlab, qobiliyatlarini yuzaga chiqarish, ularning bilim va ko'nikmalarini oshirish, bu orqali ular orasidan kuchli shahmatchilar yetishib chiqishini ta'minlashga xizmat qiladi.

Tadbir davomida endilikda mamlakatimiz hududlaridagi mehnat jamoalarida “Shaxmat klublari” tashkil etilishi, korxona, tashkilot va muassasalar xodimlari o'rtasida har yili shaxmat bo'yicha tuman-hudud-respublika bosqichlaridan iborat musobaqalarni o'tkazish ko'lami yanada kengaytirilishi ta'kidlandi.

Quvonarlisi, mamlakatimiz kasaba uyushmalari harakatining 120 yilligi oldidan amalga oshirilgan ushbu xayrli loyiha natijasida shaxmat ishqibozlari ushbu maktabda aql gimnastikasi sirlarini bepul o'rganish imkoniyatiga ega bo'ladilar.

Muhabbat O'RMONBEKOVA,
O'zbekiston kasaba uyushmalari Federatsiyasi Matbuot xizmati rahbari