Toshkentning qoq markazida, Amir Temur shoh ko'chasida joylashgan noyob arxitektura obidasidan bir asrdan ziyod vaqt mobaynida nafaqat buzilishlardan omon qoldi, balki 1966 yildagi dahshatli zilzilaga ham mardonavor dosh berdi. Bugun esa u hali ham o'z vazifasini bajarmoqda — aholi uchun turar joy bo'lib xizmat qilmoqda.

ishonch.uz sayti ushbu binodan fotoreportaj tayyorladi.

Ushbu tarixiy bino 1927 yilda mashhur rus me'mori Georgiy Mixaylovich Svarichevskiy loyihasi asosida barpo etilgan. Svarichevskiy nafaqat bu inshoot, balki Toshkent temir yo'l vokzali, Okrujnoy sud (hozirgi Temir yo'l boshqarmasi binosi), sobiq Kaplan dorixonasi va yana ko'plab muhim loyihalar muallifi sifatida tanilgan.
Bu ikki qavatli turar joy tashqi ko'rinishidan sodda g'ishtli bino bo'lib tuyulishi mumkin, ammo uning ichki arxitekturasi hayratlanarli darajada boy va tabiatga hamohang. Old tomonga o'tilsa, binoning yog'ochdan ishlangan klassik balkonlari, keng ayvonli hovlisi, ulkan daraxtlar va yashillik ichiga g'arq bo'lgan derazalarni ko'rish mumkin. Hovlida sayr qilar ekansiz, bu yerga qiziqqan mahalliy va xorijiy sayyohlarga ham ko'zingiz tushadi.
Binoning yana bir ahamiyatli jihati — u rasman madaniy meros ob'ekti sifatida davlat muhofazasiga olingan. Bu nafaqat uning arxitektura qiymatini, balki tarixiy va madaniy ahamiyatini ham tasdiqlaydi.

Bugungi kunda tez sur'atda rivojlanayotgan shaharsozlik jarayonida shunday obidalarning saqlanib qolishi — kelajak avlod uchun yuksak ahamiyatga ega.

E'zoza Umrzoqova,
ishonch.uz